Jaıdaqbulaq orta mektebine qoǵam qaıratkeri Seıdahmet Bosqynbaevtyń aty berildi - Almaty oblysy
ASTANA. QazAqparat - Qazaqstan Respýblıkasy Úkimetiniń 2016 jylǵy 28 jeltoqsandaǵy «Almaty oblysynyń keıbir bilim berý uıymdaryn qaıta ataý týraly» №883 qaýlysyna sáıkes, Raıymbek aýdanynyń «Jaıdaqbulaq orta mektebi» kommýnaldyq memlekettik mekemesi - «Raıymbek aýdandyq bilim bólimi» memlekettik mekemesiniń «Seıdahmet Bosqynbaev atyndaǵy orta mektep» kommýnaldyq memlekettik mekemesi bolyp qaıta ataldy.
Seıdahmet Bosqynbaev 1904 jyly Almaty oblysy, Kegen aýdanyndaǵy, Merki aýylynda sharýa otbasynda dúnıege kelgen. 1916 jyly tórt aılyq qazaq aýyldyq mektebin bitiredi. Іskerlik jáne uıymdastyrýshylyq qabilet-qarymymen tanylǵan S.Bosqynbaev «Qosshy» odaǵynyń aýyldyq uıymynyń tóraǵasy qyzmetin atqarady. 1930 jyly partııa qataryna ótedi.
1927-1929 jyldary Kegen aýdanyndaǵy Toraıǵyr aýyldyq keńesiniń tóraǵasy, 1929-1931 jyldary aýdandyq Jer komıtetiniń tóraǵasy, 1931-1933 jyldar aralyǵynda Jer bóliminiń meńgerýshisi, dırektory qyzmetterin atqarady. 1933 - 1934 jyldary Kegen aýdandyq atqarý komıtetiniń jaýapty hatshysy, odan keıin aýdandyq partııa komıtetiniń nusqaýshysy bolyp eńbek etedi. 1935 - 1936 jyldary Uıǵyr aýdandyq partııa komıtetiniń nusqaýshysy, 1936 jyly Almaty oblysy, Bórlitóbe aýdandyq partııa komıteti hatshysynyń orynbasary qyzmetterin atqarady. Otyz úsh jasynda Andreev aýdandyq partııa komıtetiniń ekinshi hatshysy bolyp bekitiledi.
Derekter S.Bosqynbaevtyń kórnekti memleket jáne qoǵam qaıratkeri Oraz Jandosovpen el múddesi jolynda murattas bolǵanyn kórsetedi. Biraq, bul jaǵdaı 37-shi jylǵy zobalańda jazyqsyz ustalyp, túrmege jabylýyna sebep bolady. Arystaı azamatqa Kegen aýdanynda qyzmette júrgeninde Jandosovtyń úzeńgiles serigi bolǵany kiná bolyp taǵylady. Óıtkeni, O.Jandosov bul kezde «halyq jaýy» bolyp «qara tizimge» ilikken edi.
KSRO Joǵarǵy Soty Áskerı kollegııasynyń anyqtamasynda Seıdahmet Bosqynbaevtyń 1958 jyly aqtalǵandyǵy týraly málimet keltirilgen.
