Jaıaýdy qaǵyp mert qylǵan júrgizýshi úıqamaqqa alyndy
KÓKShETAÝ. QazAqparat - Aqmola oblysynyń Atbasar aýdandyq soty jaıaýdy qaǵyp mert qylǵan júrgizýshini eki aıǵa úıqamaqqa alý týraly sharasyn qoldandy, dep habarlaıdy QazAqparat tilshisi Aqmola oblystyq sotynyń baspasóz qyzmetine silteme jasap.
Aqmola oblystyq soty Atbasar aýdandyq sotynyń qaýlysyn ózgertip, kúdiktini 2 aı boıy úıqamaqta ustaý týraly sharasyn taǵaıyndady. Oǵan qosa, kúdikti er adamǵa úıinen shyǵýǵa, telefonmen sóılesýge, habarlama jiberýge, jáne baılanys quralyn paıdalanýǵa tıym salyndy. Kúdiktige tergeý organdary men prokýratýraǵa qylmystyq isti júrgizý úshin baryp turý mindetteldi. Ony baqylap otyrý Atbasar aýdandyq ІІB júkteldi.
«Kúdiktiniń qorǵaýshysy men jol-kólik oqıǵasynan mert bolǵan áıeldiń qyzynyń apellıatsııalyq aryzy qanaǵattandyryldy. Zardap shegýshi óziniń aryzynda osyǵan deıin qolǵa alynǵan shara qatań ekenin aıtyp, sottan ony jumsartý qajettigin ótingen bolatyn. Qyz óziniń áreketin kúdiktiniń kánisin moıyndaǵanyn jáne úıine kelip, keshirim surap, otbasyna materıaldyq kómek kórsetkenin aıtyp túsindirdi. Al qorǵaýshysy bolsa, kúdikti týraly jaqsy minezdeme men tórt balanyń ákesi ekeni jáne turaqty mekenjaıy boıynsha anyqtama qujattar usyndy. Sonymen qatar, tergeý organdary kúdiktige abaısyzda adam óltirip aldy degen bap boıynsha is qozǵany eskerildi. Al oqıǵa ornynan qashyp ketkendigi jóninde aıǵaqtardyń bolmaýynan bul jaǵynan oǵan qosymsha aıyp taǵylmady», - dep túsindirdi sottyń baspasóz qyzmetindegiler.
Eske sala keteıik, aǵymdaǵy jyldyń 8-shi sáýirinde Atbasar qalasynda Toyota Land Cruiser kóliginiń 31 jastaǵy júrgizýshisi joldyń shetinde ketip bara jatqan eki jaıaýdy qaǵyp ketken bolatyn. Sonyń saldarynan 47 jastaǵy áıel oqıǵa ornynda kóz jumsa, ekinshi zardap shegýshi túrli dene jaraqatymen ortalyq aýdandyq aýrýhanaǵa jetkizildi. Al kólik júrgizýshisi izin sýytqanymen bir táýliktiń ishinde qolǵa tústi. Aqmola oblysynyń prokýratýrasynyń deregine qaraǵanda, kúdikti buǵan deıin de dál osyndaı qylmysy úshin isti bolǵan.
