Jaıaý júrginshilerdiń jerasty ótkeline kólikpen kirip ketken júrgizýshi ustaldy
Aqtóbedegi Bersıev kóshesindegi jerasty ótkeline kólikpen kirip, ony áleýmettik jelige jarııalaǵan júrgizýshi ustalyp, ákimshilik jaýapqa tartyldy, dep habarlaıdy Kazinform.
Aqtóbe oblystyq PD baspasóz qyzmetiniń habarlaýynsha, tártip saqshylary áleýmettik jelige monıtorıng jasap, jerasty jolynda vıdeo túsirgen aqtóbelikterdi anyqtady.
«Toyota Land Cruiser Prado kóliginiń júrgizýshisi Aqtóbe qalasy Bersıev kóshesinde ornalasqan jerasty jaıaý júrginshiler ótkeli arqyly júrgeni anyqtaldy. Patrýldik polıtsııa qyzmetkerleri atalǵan kóliktiń júrgizýshisin anyqtap, polıtsııa bólimine jetkizip, oǵan qatysty ÁQBtK-niń 590 baptyń 7-bóligi jáne ÁQBtK-niń 620-baby boıynsha ákimshilik hattama toltyryldy. Eki kólik aıyp turaǵyna qoıyldy», - dep habarlady oblystyq PD baspasóz qyzmetiniń jetekshisi Erbolat Sarqulov.
Keıin aqtóbelik júrgizýshi óz isi úshin halyqtan keshirim surady. Alaıda olar eki kún buryn jóndelgen jaryqshamdy syndyrmaǵanyn aıtyp tur. Aqtóbe qalalyq ákimdigi bolsa, muny vandaldardyń isi ekenin aıtyp, habarlama taratty.
«Eki kún buryn kezekti ret Sh.Bersıev kóshesindegi jerasty ótkelinde jáne oǵan irgeles aýmaqta kóshe jaryqtandyrý elementterin aýystyrý jumystary júrgizildi. Ókinishke qaraı, jaryqtandyrý elementterine taǵy da vandaldar shabýyl jasady. Bul joly olar jaıaý adamdarǵa arnalǵan ótkelge avtokólikpen kirgen. Jalpyǵa ortaq múliktiń búlingeni týraly aqparat quqyq qorǵaý organdaryna quqyq buzýshylardyń jeke basyn anyqtaý jáne jaýapkershilikke tartý úshin berildi. Turǵyndardyń qaýipsizdigin qamtamasyz etý maqsatynda jaryqtandyrý qalpyna keltirildi», - dep jazdy Aqtóbe qalasy ákiminiń baspasóz qyzmeti.
