Jaıaý júrginshini kólikpen qaǵyp óltirgen prokýrordyń kómekshisi qyzmetinen shettetildi
ASTANA. 16 qańtar. QazAqparat - Astanada túngi ýaqytta jaıaý júrginshini kólikpen qaǵyp óltirgen Almaty aýdandyq prokýrorynyń kómekshisi qyzmettik mindetterin atqarýdan shettetildi. Bul týraly Astana prokýratýrasynyń baspasóz qyzmeti habarlady.
«2014 jyldyń 3 qańtarynda túngi ýaqytta Almaty aýdandyq prokýrorynyń kómekshisi Shyńǵysov M.M. óz kóligimen túngi kezekshilikten úıine qaıtyp kele jatyp Aqpanov J. esimdi jaıaý júrginshini qaǵyp ketti. Jábirlenýshi aýrýhanada kóz jumdy», - delingen vedomstvonyń habarlamasynda.
Jol-kólik oqıǵasy boıynsha Astana qalalyq ІІD qylmystyq is qozǵap, qazirgi ýaqytta aldyn ala tergeý amaldary júrgizilip jatyr.
«Astana qalalyq prokýrorynyń buıryǵymen atalǵan aýdan prokýrorynyń kómekshisi qyzmettik mindetterinen shettetilip, oryn alǵan jol-kólik apaty boıynsha qyzmettik tekseris júrgizilýde», - deıdi qalalyq prokýratýradaǵylar.
