Jaıaý júrginshini qaqqan qostanaılyq júrgizýshi kýáliginsiz bolǵan
QOSTANAI. QazAqparat - Qostanaılyq tártip saqshylary jol qıylysynda jaıaý júrginshini qaǵyp ketken «Gaz» avtokóliginiń júrgizýshisin ustady, dep habarlaıdy QazAqparat oblystyq sottyń baspasóz qyzmetine silteme jasap.
Qostanaı qalasynyń mamandandyrylǵan ákimshilik soty jaıaý júrginshini soǵyp, qashyp ketken júrgizýshige qatysty isti qarady. Ákimshilik quqyq buzýshylyq týraly hattamaǵa sáıkes, azamat O. júrgizýshi kýáliginsiz «Gaz» avtokóligin basqarǵan.
«1991 jyly týǵan azamat O. jol qıylysynda jaıaý júrginshini qaǵyp ketken. Ol jol-kólik oqıǵasynyń qatysýshysy bola tura oqıǵa bolǵan jerden izin sýytady. Sot otyrysynda jaýap bergen kýáger R. azamat O.-nyń jol-kólik oqıǵasy ornynan ketip qalý faktisin rastady. QR ÁQBtK 611 babynyń 3 bóligi boıynsha (júrgizýshiniń jol-kólik oqıǵasyna baılanysty mindetterdi oryndamaýy) ol kináli dep tanyldy», - delingen oblystyq sottyń baspasóz habarlamasynda.
Sot sheshimi boıynsha azamat O. 100 AEK, ıaǵnı 240 500 teńge mólsherinde ákimshilik aıyppul tóleıdi.
Qaýly zańdy kúshine engen joq.
