Jaıaý júrginshini qaǵyp, oqıǵa ornynan boı tasalaǵan júrgizýshi ustaldy - Almaty oblysy
TALDYQORǴAN. QazAqparat - Almaty oblysynyń polıtsııasy jaıaý júrginshini qaǵyp, oqıǵa ornynan jasyrynǵan júrgizýshini quryqtady. Bul týraly QazAqparat tilshisi oblystyq Іshki ister departamentiniń baspasóz qyzmetine silteme jasap habarlaıdy.
Aqparatqa qaraǵanda, kisi ólimine sebepshi bolǵan júrgizýshi men onyń kóligin anyqtaý úshin polıtsııa tórt kún boıy tynbaı izdengen. «Jambyl aýdany Qarǵaly aýylynda jergilikti turǵyndar 12-sinen 13-i naýryzǵa qaraǵan túni 56 jastaǵy er adamnyń denesi tabylǵany týraly habarlady. Sot-medıtsınalyq saraptamalar kisi óliminiń kólik soqqysynan alǵan jaraqat saldarynan bolǵanyn anyqtaǵan. Osyǵan baılanysty jol kólik oqıǵasy boıynsha polıtsııa qyzmetkerleri qylmystyq is qozǵady», - delingen baspasóz baıanynda.
Oqıǵa ornyn muqııat qarap shyqqan polıtsııa kóliktiń bamperi men aına synyqtaryn taýyp, ony qylmystyq iske zattaı aıǵaq retinde tirkegen bolatyn. Sonymen qatar, polıtsııa jaıaý júrginshini «Nıssan Tıana» kóliginiń qaqqanyn anyqtady. Budan soń, jedel sharalar barysynda izdeý jarııalanǵan kólik tabylyp, onyń júrgizýshisine jol-kólik oqıǵasyna qatystylyǵy dáleldendi.
«Kúdikti retinde ustalǵan azamat 1992 jyly týǵan, Úmbetáli aýylynyń turǵyny bolyp shyqty. Kólik arnaıy turaqqa qoıylyp, oqıǵa boıynsha tıisti saraptamalar jasaldy», - delingen baspasóz habarlamasynda.
