Jaıaý júrginshini qaǵyp, mert qylǵan qostanaılyq polıtseı qamaldy
QOSTANAI. QazAqparat - Amangeldi aýdanynda 22 jastaǵy tártip saqshysy áıel men onyń balasyn qaǵyp ketken, dep habarlaıdy QazAqparat tilshisi.
Oqıǵa keshe saǵat 8:35 shamasynda Dúısenbın kóshesinde bolǵan. Aqparatty oblystyq ІІD rastady.
''Jol-kólik apaty ornyna jedel-iz kesý toby shyqty. Belgili bolǵandaı, 22 jastaǵy polıtsııa qyzmetkeri 33 jastaǵy áıel men onyń 7 jasar qyzyn soǵyp ketken. Aýyr dene jaraqaty saldarynan áıel oqıǵa ornynda kóz jumdy. Al mektep oqýshysy aýdandyq aýrýhanaǵa jetkizildi'',- dedi oblystyq ІІD baspasóz hatshysy Irına Bejenar ''QazAqparat'' tilshisine.
Polıtseıdiń qyzmettik kólik mingeni jáne kólik júrgizý quqyǵyn rastaıtyn qujatynyń bolmaǵany anyqtaldy. Qazir ol Arqalyq qalasy ІІB ýaqytsha ustaý oqshaýlaǵyshyna qamaldy. Atalǵan fakt boıynsha sotqa deıingi tergeý sharalary bastaldy.
