Jaıaý júrginshini qaǵyp ketken aqtóbelik turǵyn jábirlenýshige mıllıon teńge tóleıdi
Oqıǵa byltyr qarasha aıynda boldy. Jol-kólik oqıǵasy saldarynan jaıaý júrginshi aýyr jaralanyp, birneshe aı boıy em qabyldady. Sot-medıtsınalyq saraptama qorytyndysyna súıenek, onyń oń jambasy synyp, bas súıegi jarylǵan. Tipti mıy shaıqalǵan. Talap qoıýshy birneshe ret em qabyldaǵanyn jáne tabysynan aıyrylǵanyn aıtyp, sotqa aryz túsirdi. Ol 2,5 aı ishinde joǵaltqan tabysy retinde 200 000 teńge, al moraldyq ótemaqy dep 1 000 000 teńge somasynda jáne sot shyǵyndaryn óndirip berýdi surady.
«Qylmystyq kodekstiń «Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy saldarynan abaısyzda adamnyń densaýlyǵyna aýyr zııan keltirýge ákep soqqan is-áreket» baby boıynsha tergeý júrip, is qozǵalǵanymen byltyr jeltoqsan aıynda raqymshylyq jasaý aktisi qoldanylǵan. Sotta istiń toqtatylǵany anyqtaldy. Jaýapker óz kezeginde talapkerge joǵaltqan jalaqysy úshin 80 000 teńge, moraldyq zııan esebinen 20 000 teńge jáne aýrýhanada emdelgeni úshin 146 300 teńgeni óz erkimen tólegenin túsindirdi.
Sotta talap aryzdy qanaǵattandyrýdan bas tartýdy surady. Barlyq mán-jaılardy zerttegen sot talap aryzdy tolyǵymen qanaǵattandyrdy. Talap qoıýshynyń paıdasyna joǵaltqan tabys somasy, ıaǵnı, 200 000 teńge, moraldyq zııan somasy 1 000 000 teńge, ókildiń kómegi úshin 120 000 teńge jáne memlekettik baj salyǵyna 3 532 teńge óndirildi. Apellıatsııa sot sheshimin kúshinde qaldyrdy», - dedi oblystyq sottyń baspasóz qyzmeti.
