Jaıaý júrginshini qaǵyp ketip, keıin ózenge batyryp óltirgen pavlodarlyq sottaldy
PAVLODAR. QazAqparat - Pavlodar oblysynyń qylmystyq ister jónindegi mamandandyrylǵan aýdanaralyq soty jaıaý júrginshini óltirgen aýyl turǵynyn bir jarym jylǵa bas bostandyǵynan aıyrdy, dep habarlaıdy «QazAqparat» HAA tilshisi.
«2017 jyldyń 21 qazanynda Bashmachnoe aýylyndaǵy dámhanada dostarymen ishimdik ishken aýyl turǵyny VAZ-2104 avtokóligimen jaıaý júrginshi O.Şerbakovany qaǵyp ketken. Ol jolda jatqan áıeldi kóligine súırep kirgizip, jar jıegine qaraı júrgen. Keıin kólikten sekirip túsip qalady. O.Şerbakova bolsa avtomobılmen ózenge qulap, mert bolady»,-dep habarlady sottyń baspasóz qyzmetinen.
Sot Jelezın aýdanyndaǵy Bashmachnoe aýylynda turatyn 26 jastaǵy jigittiń qylmystyq isin QR QK 104-baby 1-bóligi («Abaısyzda kisi óltirý»), 345-baby 2-bóligi («Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy»), 347-baby («Jol apaty ornyn tastap ketý») jáne 99-baby 2-bóliginiń 10-tarmaǵy («Basqa qylmysty jasyrý nemese ony jasaýdy jeńildetý maqsatymen jasalǵan, sol sııaqty zorlaýmen nemese seksýaldyq sıpattaǵy zorlyq-zombylyq áreketterimen ushtasqan») boıynsha qarady.
Sot aıyptalýshyny bir jarym jylǵa bas bostandyǵynan aıyrýǵa úkim etti. Bul merzimnen onyń 2017 jylǵy 22 qazannan bastap qamaýda bolǵan ýaqyty shegeriledi.
Ol jazany qylmystyq atqarý júıesiniń qaýiptiligi tómen mekemesinde óteıtin bolady. Sonymen birge memleket paıdasyna 503 661 teńge kólemindegi sot shyǵyndary óndirilip alynady.
Foto: telefakt.ru
