Jaıaý júrginshilerdi kóligimen basyp ótken amerıkalyqqa qatysty sot otyrysy bastaldy
ASTANA. QazAqparat - Nıý-Iorktiń Taıms-skver alańynda jaıaý júrginshilerdi kóligimen janshyp ótken Rıchard Rohas otstavkadaǵy amerıkalyq áskerı qyzmetshi. Manhettendegi federaldy sotta bastalǵan sot otyrysynda oǵan adam óltirý jáne adam óltirýge oqtalý aıyptary taǵyldy, dep habarlaıdy QazAqparat Associated Press (AR) agenttigine silteme jasap.
Esirtkige elikken kúıde Honda Accord kóligin basqarǵan 26 jastaǵy Rohas beısenbi kúni tańerteń joǵary jyldamdyqta júıitkip kele jatyp, Taıms-skver alańynyń trotýaryna shyǵyp ketti . Oqıǵa saldarynan 22 adam jaraqat aldy, 18 jastaǵy qyz sol orynda kóz jumdy.
AR málimetinshe, sot otyrysynda sýdıa Rohastan óz kinásyn moıyndaıtynyn, ne moıyndamaıtynyn suraǵan joq. Otyrys barysynda prokýratýra qyzmetkerleri atap ótkendeı, Rohas ustalǵannan keıin adamdardyń barlyǵyn óltirgisi kelgenin jáne polıtseıler ony atyp óltirgenin qalaıtynyn aıtqan.
Sotqa usynylǵan qujattarǵa sáıkes, Rohas 2011 jyly AQSh-tyń Áskerı teńiz kúshterinde qyzmetten ótken, al 2013 jyly Ońtústik Korolınadaǵy túrmede eki aı otyrǵan. Oǵan sol kezde qandaı aıyptar taǵylǵandyǵy jazylmaǵan. Áskerı trıbýnaldyń sheshimimen ol 2014 jyly áskerı qyzmetten bosatyldy.
Nıý-Iorktegi is boıynsha kelesi sot otyrysy kelesi aptada jalǵasady.
Aıta keteıik, Nıý-Iork bıligi bul oqıǵany lańkestikpen baılanystyrmaıtynyn málim etti.
