Jaıaý sherý toptarynyń legin Memlekettik kúzet qyzmetiniń rotasy túıindedi

ASTANA. QazAqparat - Astanada «Qazaq Eli» monýmenti alańynda QR Prezıdenti - Joǵarǵy Bas qolbasshy Nursultan Nazarbaevtyń qatysýymen Otan qorǵaýshylar kúnine jáne Uly Otan soǵysyndaǵy jeńistiń 70 jyldyǵyna arnalǵan áskerı sherýi jalǵasýda. Sharanyń birinshi bóliminde jeke quramnyń sherý toptary alańdy boılaı ótip jatyr.

Ortalyq alańnan Keńes Odaǵynyń eki márte batyry T.Bıgeldınov atyndaǵy áýe-qorǵanysy kúshteri áskerı ınstıtýtynyń kýrsanttary ótýde. 1998 jyldan beri ınstıtýtty 1800-den astam ofıtser bitirip shyqty. Olar búginde qarýly kúshterde basqa da áskerı qurylymdardyń avıatsııalyq bólimderinde ózderiniń jaýyngerlik boryshtaryn atqarýda.

Trıbýnaǵa Ulttyq Gvardııanyń Petropavl áskerı ınstıtýtynyń kýrsanttary jaqyndap keledi. Oqý orny 1997 jyly qurylǵan. Búginde halyqaralyq deńgeıdegi eń úzdik áskerı oqý oryndarynyń biri sanalady.

Paradty Sh.Ýálıhanov atyndaǵy kadet korpýsynyń saltanatty sherýi jalǵastyrady. QR Qorǵanys mınıstrligi Kadet korpýsynyń negizgi mindeti - kásipqoı serjanttar daıarlaý.

Aldymyzda QR Qarýly kúshteriniń Áskerı polıtsııasynyń paradtyq esep toby sherýletip keledi. Olardyń sapynda erekshe jaǵdaılarda qoldanylatyn shuǵyl áreket etý bólimderiniń áskerı qyzmetkerleri mindetin atqarady.

Ortalyq minbege UQK Shekara qyzmetiniń paradtyq esep toby jaqyndady. Shekara qyzmeti QR Qarýly kúshterimen birge shekaradaǵy qaýipsizdikti qamtamasyz etip, elimizdiń tynyshtyǵyn kirpik qaqpaı kúzetýde.

QR Ulttyq gvardııasynyń shuǵyl maqsattaǵy alǵashqy jeke bóliminiń paradtyq esep toby júrip keledi. Uly Jeńistiń 70 jyldyǵyn toılaý kezinde olar «Biz - Jeńis muragerlerimiz» atty aktsııa uıymdastyrdy.

Minber aldynan QR ІІM TJK-ge qarasty Kókshetaý tehnıkalyq ınstıtýtynyń kýrsanttary ótýde. Onda túrli sıpattaǵy qysyltaıań jaǵdaılarda aýqymdy mindetterdi sheshe alatyn bilikti ofıtserlerdi daıarlanady.

Sherýdiń sońynda QR Memlekettik kúzet qyzmetiniń rotasy júrip keledi. Olar Prezıdentke tikeleı baǵynady jáne Prezıdent aldynda esep beredi, sondaı-aq Respýblıkanyń ulttyq qaýipsizdigin qamtamasyz etetin kúshke jatady.