Jaıaý saıahatshy: 20 kúnde 820 shaqyrym jol júrdim

ATYRAÝ. QazAqparat – Atyraýdan álemdi jaıaý aralaýǵa shyqqan saıahatshy Sársenbaı Qotyrashov 20 kúnde 820 shaqyrym jol júrdi. Ol Sheshenstan astanasy Groznyı qalasyna jaqyndady, dep habarlaıdy QazAqparat tilshisi.

«Mine, dostar, Groznyıǵa da jetip qaldym. 20 kúnde 820 shaqyrymdaı jol júrdim. Ár el men qalalardy ózim úshin ashqan saıyn ómirimniń máni artyp keledi», - dep jazdy áleýmettik jelidegi paraqshasynda. Ulytaý oblysynyń týmasy Sársenbaı Qotyrashov Atyraýdan 2 tamyzda jolǵa shyqqan edi.

Onyń sapary úsh kezeńge josparlanǵan. Alǵashqy marshrýty – Qazaqstan, Reseı, Grýzııa, Túrkııa elderine barý. Bul elderdi aralaý úshin 100 kúnde 3 myń shaqyrymǵa jýyq jol júredi.

Ekinshi kezeńdegi 180 kúnde 9 shaqyrym jol júrip, Túrkııa, Frantsııa, AQSh elderine saıahattaıdy. Al 130 kúnge sozylatyn úshinshi kezeńdi AQSh-tan bastaıdy. Qytaı, Mońǵolııa, Reseı arqyly 4 myń shaqyrymdy artqa tastap, Qazaqstanǵa oralýdy kózdep otyr.

Jaıaý saparyn 2025 jylǵy tamyzda aıaqtaıtyn Sársenbaı Qotyrashov eki jylda 16 210 shaqyrym jol júrýdi maqsat etken.

«Meniń ustanymym – saıahattaý eshqashan kesh emes. Álem elderin jaıaý aralaǵan qazaq qarııasynyń atyn Gınnestiń rekordtar kitabyna tirkep, álemdik rekord ornatsam deımin. Eń bastysy, beıbitshilikti nasıhattap, jahan elderin yntymaqqa shaqyrǵym keledi. Bul jolǵy jaıaý saıahatym – óte jaýapty sapar. Sol sebepten álem elderine saıahatymdy sátti ótkizý úshin kúnine 30-40 shaqyrymdaı jaıaý júremin», - degen edi Sársenbaı Qotyrashov.

Jahandy jaıaý aralaýǵa shyqqan ulytaýlyq aqsaqal 8 tamyzda Reseı shekarasyna jetkenin habarlaǵan edik.

Egde jastaǵy saıahatshy Atyraý oblysyndaǵy joldyń nasharlyǵyna qynjylys bildirgenin jazǵan bolatynbyz.