Jaıaý aralap shyqtym – Marjyqbaev Atbasardaǵy qoqys máselesi qalaı sheshiletinin aıtty
NUR-SULTAN. QazAqparat – Aqmola oblysynyń ákimi Ermek Marjyqbaev Atbasardaǵy qoqys máselesi qalaı sheshiletinin aıtyp berdi, dep habarlaıdy QazAqparat tilshisi.
«Ókinishtisi, qala tazylyǵy jaǵynan qaraýsyz qalǵan. Sondaı-aq, Atbasardyń ınjenerlik júıesine jetkilikti dárejede kóńil bólinbeı kelgen. Búgingi kúni birshama shara qabyldap jatyrmyz. Óz basym qalanyń jartysyn jaıaý aralap shyqtym. Barlyq kúresinderdi araladyq. Bul qoqystar jyldar boıy jınaqtala bergen. Jyl basynda Atbasarda 25 kúresin bolsa, qazirgi ýaqytta sonyń 14-i ǵana qaldy. Bir kúresinde shamamen 5 myń tekshe metr qoqys úıilgen desek, onyń ózin joıýǵa 20-30 kúndeı ýaqyt ketedi. Tehnıkany barynsha tarttyq. Bul iste bizge bıznes ókilderi qol ushyn sozǵanyn aıta ketý kerek. Qalǵan qoqystyń bárin Atbasardan shyǵarý úshin taǵy bir jyl kerek dep bolar. Kelesi jyldyń aıaǵyna qaraı qalany qoqystan tazartyp bitýimiz kerek», - dedi oblys ákimi OKQ-da ótken baspasóz máslıhatynda.
Óńir basshysynyń aıtýynsha, qalanyń keıbir aýmaǵy qoqystan tazartylsa da, taza aýmaqtarda qaıtadan úıindiler paıda bolyp jatqan kórinedi.
«Búkil eldiń mádenıeti ózgermese, atalmysh másele túpkilikti sheshilmeıdi. Sebebi, keshe ǵana qoqystan tazartqan aýmaqtarǵa qaıta qaldyq úıilip qalyp jatyr. Bıyl qala ishindegi 1 800 metr joldy úshin bıyl 1,5 mlrd teńgege taıaý qarjy bólindi. Bul jumys qarasha aıynda bitýi tıis», - dedi ol.
