Jaıaý adamdy basyp ketken «KamAZ» júrgizýshisi shartty túrde bas bostandyǵynan aıyryldy
ASTANA. QazAqparat -Astana qalasynda jaıaý júrginshini basyp, ólimge dýshar etken «KamAz» júrgizýshisi bir jylǵa shartty túrde bas bostandyǵynan aıyryldy. Bul týraly Astana qalalyq sotynyń baspasóz qyzmetinen habarlandy.
«Astana qalasy №2 Saryarqa aýdandyq sotynda QR Qylmystyq kodeksi 345 baby boıynsha aıypty dep tanylǵan júrgizýshige qatysty isti qarady. Sot barysynda belgili bolǵanyndaı, 2015 jyldyń aqpan aıynda sottalýshy E. «KamAz» markaly kólikti basqaryp, jaıaý júrginshini basyp ketken. Jol-kólik oqıǵasy saldarynan jaıaý júrginshi oqıǵa ornynda qaza tapty», - delingen baspasóz baıanynda.
Osyǵan baılanysty sottalýshy kináli dep tanylyp, ony jazasyn qonys-kolonııada óteý boıynsha bir jyl merzimge bas bostandyǵynan aıyrý týraly úkim shyǵaryldy. Sonymen qatar, júrgizýshiniń kólik quralyn basqarý quqyǵyna 2 jylǵa deıingi merzimge tyıym salyndy.
Aıta keterligi, júk kóliginiń júrgizýshileri kinásinen bolǵan qaıǵyly oqıǵalar buǵan deıin de oryn alǵan edi. Máselen, bıyl sáýir aıynda Astanada beton tasıtyn júk kóligi baǵdarshamnyń belgisine qaramastan joldy qıyp ótip, jaıaý júrginshini qaqqan bolatyn. Oqıǵa saldarynan japa shekken áıel jedel járdem kelgenshe til tartpaı ketken edi.
