Jaı seriktestikke birikken páter ıelerine qosymsha salyq salyna ma
Ortalyq kommýnıkatsııalar qyzmetinde ótken baspasóz konferentsııasynda jaı seriktestik formasyn tańdap alǵan páter ıeleriniń atynan saýal qoıyldy.
«Bizge keıin bolatyn qıyndyqtardy eshkim eskertpedi. Kondomınıýmdy tirkeý úshin BSN kerek eken. Ony salyq organdary beredi. BSN alý úshin jaı seriktestikke jeke kásipker retinde tirkelý qajet dep otyr. Sonda jaı seriktestik quramyna kirgen páter ıeleri qosymsha salyq tóleıdi degen sóz be», - delingen saýalda. Bul suraqqa «Turǵyn úı-kommýnaldyq sharýashylyǵyn jańǵyrtý men damytýdyń qazaqstandyq ortalyǵy» AQ óńirlik damý jáne ádisnama departamentiniń basshysy Marǵulan Ábdikárimov jaýap berdi.
«Múlik ıeleri birlestigi zańdy tulǵa bolsa, jaı seriktestikter zańdy tulǵa emes. Sondyqtan birlesken qyzmet týraly kelisimshart negizinde jumys isteıdi. Páter ıeleri jaı seriktestiktiń senimdi ókiline senimhat berýi kerek. Jaı seriktestik zańdy tulǵa bolmaǵandyqtan, oǵan BSN berilmeıdi. Basqarýdyń bul túri jeke kásipker de bola almaıdy. Osy turǵydan alǵanda Salyq kodeksiniń 98-baby jeke kásipker retinde tirkelgen birlestikterge ǵana qoldanylady. Birlesken qyzmet týraly kelisimshart negizinde jumys isteıtin jaı seriktestikke bul norma qoldanylmaıdy», - dedi departament ókili.
Onyń sózine qaraǵanda jaı seriktestikke birikken páter ıeleri múlik salyǵyn Salyq kodeksiniń 199-baby boıynsha tóleýge mindetti.
«Birlesken qyzmet týraly kelisimshart bolǵan jaǵdaıda kelisimshartta menshik ıesiniń sany 2 nemese odan kóp bolsa, árbir múlik ıesi ózine tıesili salyqty ǵana tóleı alady. Eger jaı seriktestik kondomınıým quramyna kiretin turǵyn emes ǵımaratty jalǵa berse, deklaratsııa tapsyrý kerek bolady. Qazir Turǵyn úı-kommýnaldyq sharýashylyǵyn jańǵyrtý men damytýdyń qazaqstandyq ortalyǵy, Qurylys isteri jónindegi komıtet Qarjy mınıstrliginiń Memlekettik kirister komıtetimen jaı seriktestikterdiń jumysyna baılanysty týyndaıtyn osyndaı máselelerdi retteý boıynsha jumys júrgizip jatyr. Sondyqtan, múddeli organdar arasynda bul usynystar qaralyp jatyr. Onyń nátıjesi qosymsha habarlanady», - dedi Marǵulan Ábdikárimov.
