«Jaýjúrek Myń bala» fılmi AQSh-ta prokatqa shyǵady
ASTANA. 13 jeltoqsan. QazAqparat - Kóptiń kóńilin baýrap, qazaqtyń úzdik týyndysy atanǵan «Jaýjúrek Myń bala» fılmi Amerıka Qurama Shtattarynda prokatqa shyǵady.
Bul jóninde Sh.Aımanov atyndaǵy «Qazaqfılm» kınostýdııasynyń prezıdenti Ermek Amanshaev málimdedi.
«Aıqyn» gazetiniń jazýynsha, aldaǵy ýaqytta Nıý-Iorkte, Los-Andjeleste fılmniń kórsetilimi bolady. Al aqpan aıynda fılm resmı túrde prokatqa shyǵarylmaq. «Qazaqfılmniń» sońǵy jyldardaǵy jemisine aınalǵan kınotýyndy «Oskarǵa» da usynylǵan bolatyn.
«Qazir irikteý jumystary júrip jatyr. Búgingi kúnge deıin daýys beretin akademııa múshelerine arnaıy bes kórsetilim jasadyq. Qorytyndysy jańa jyldan keıin shyǵady. «Oskardyń» long-lıst, short-lıst degen nomınatsııalar bar. Short-lıstke dúnıe júzinen 72 fılm tústi, onyń ishinde «Jaýjúrek Myń bala» bar. Eger ondyqqa iliksek, alǵashqy qadam retinde jaqsy oqıǵa bolar edi. Úmitimiz bar», - dep atap ótti Ermek Amanshaev.
Eger kınotýyndy úzdik ondyqtyń qataryna ilikse, bul qazaq kınosy tarıhyndaǵy tyń serpilis bolar edi.
Taǵy bir aıta keterligi, keler jyly Aqan Sataevtyń «Jaýjúrek Myń bala» kınotýyndysynyń negizinde anımatsııalyq hıkaıa da túsirilmek.
«Tek qana túsirip qoımaı, personajdardyń qýyrshaqtaryn shyǵarý, shamamyz kelse, kompıýterlik oıyndar qalyptastyrýdy josparlap otyrmyz. «Jaýjúrek Myń bala» fılminiń bedeli arqasynda bolý kerek, búgingi kúni qomaqty qarjy bóletin ınvestorlar da tabylyp jatyr», - dedi Ermek Amanshaev.
