Jaýyngerlik paradqa daıyndyq bastaldy - QR Qorǵanys mınıstrligi
Oǵan Qarýly Kúshteri Bas shtaby bastyǵynyń orynbasary general-maıor Muqan Dúısekeev basshylyq jasaýda. Bul týraly QR QM baspasóz qyzmetinen habarlandy.
Jedel toptyń quramyna Qazaqstannyń Qorǵanys mınıstrligi men Qarýly Kúshteriniń túrli qurylymdyq bólimsheleriniń ókilderi endi. Ofıtserlerdiń aldynda Jaýyngerlik paradqa daıyndyq jónindegi barlyq máselelerdi úılestirý mindeti tur. Buǵan deıin habarlaǵanymyzdaı, Jaýyngerlik parad osy jyldyń 7 mamyry - Otan qorǵaýshylar kúni ótedi. Qazirgi ýaqytta áskerı baza aımaǵynda Jaýyngerlik paradqa qatysatyn jaýyngerik tehnıkalar men bólimshelerdiń jeke quramy shoǵyrlaný ústinde. Jaýyngerlik paradqa barlyǵy 7 myń áskerı qyzmetshi, 400-den astam brondy mashınalar, avtotehnıkalar, 80-nen astam ushaqtar men tikushaqtar qatysady. Áskerı bólimsheler qazirgi tańda Qurlyq áskerleri men Áýe qorǵanysy kúshteri jaraqtanǵan qazirgi zamanǵy qarýlar men tehnıkalardy is júzinde qoldanýda taktıkalyq sheberlikterin kórsetetin bolady.
Búgin «Otar» 40-shy áserı bazasyna temir jolmen eki eshelon tanki jáne motoatqyshtar bólimsheleri kelip jetti. Erteń Aqtaýdan teńiz jaıaý áskeriniń batalony men «Batys» óńirlik qolbasshylyǵynyń barlaý bólimshesi keledi.
Otarǵa munyń aldynda avıatsııalyq materıaldyq-tehnıkalyq qamtamasyz etý bólimderi barlyq qajetti qural jabdyqtarymen jetken bolatyn. Jaýyngerlik paradqa alańsyz, tyńǵylyqty daıyndalý úshin áskerı avıatsııa ushqyshtaryna arnalyp jeke lager tigilmek.