Jaýyngerlik oqý-jattyǵýǵa kiristi
TANA. 19 qyrkúıek. QazAqparat. Búgin Qazaqstandaǵy «Oımasha» polıgonynda iri kólemdi birlesken «Ortalyq-2011» strategııalyq jattyǵýy bastalady. Jattyǵýǵa Qazaqstan Respýblıkasy Qarýly Kúshteri Qurlyq áskerleriniń bas qolbasshysy general-leıtenant Murat Maıkeev jetekshilik etedi, dep habarlaıdy mınıstrliktiń baspasóz qyzmeti.
Atalmysh sharanyń ashylýyna baılanysty oqý ortalyǵynyń alańynda Qazaqstan Qarýly Kúshteri men Reseı jaǵynan jattyǵýǵa qatysatyn úsh jarym myńǵa jýyq jeke quram saltanatty sap túzedi. Qatysýshy elderdiń án urany oryndalyp, memlekettik jalaýlary kóterildi. Jattyǵý jetekshisi jınalǵandarǵa jyly lebizin bildirdi. Ol óz sózinde búgingi jattyǵý eki el arasyndaǵy seriktestiktiń damýyna, ózara is-qımyldy jetildire túsýge, áskerı salada baılanysty nyǵaıtýǵa jańasha qozǵaý salatyndyǵyn atap ótti.
- Birlesken jattyǵý bizderge áskerı kásibıligimizdi jetildire túsýge jáne jaýyngerlik sheberligimizdi arttyrýǵa múmkindik beredi. Sondyqtan negizgi bizdiń mindetimiz - óz Otanyn qorǵaı alatyn adamgershiligi joǵary, shynyqqan shymyr, sanaly da saýatty kásibılerdi daıyndaý. Birlesken jattyǵýda alǵa qoıǵan maqsatymyzǵa jetetindigimizge senimdimin, - dep atap ótti general-leıtenant Murat Maıkeev.
Ózderine qoıylǵan tapsyrmany oryndaýǵa ázir áskerı qyzmetshiler saltanatpen sap túzep ótti. Jeke quram qorǵanys operatsııalaryn oryndaý, jaǵdaıdy óristetý jónindegi keshendi sharalardy oryndaýǵa ázir.
«Oımasha» polıgonynda Qazaqstan Qarýly Kúshteri men Reseı jaǵynan 550-den astam áskerı tehnıka, áýede 19 ushaq jáne teńizde 43 keme birlesken jaýyngerlik jattyǵýlaryn bastaıdy.
Áskerlerdiń birlesken jattyǵýlary erteńge josparlanǵan. Jattyǵýdyń alǵashqy kezeńinde bólimder negizgi aýdanda ornalasady jáne belgilengen ýaqytta bir mezgilde shartty túrdegi jaýdy joıyp jiberý úshin aldyńǵy shepte shabýyldaý ádisterin oryndaıdy, sondaı-aq ózara-is-qımyl men baılanysty pysyqtaıdy. Eń bastysy - urys dalasynda Qazaqstan men Reseı áskerleriniń is júzinde bir jaǵadan bas, bir jeńnen qol shyǵara birlese is-qımyl tanytýy bolmaq.
Jattyǵýdyń negizgi arqaýy nemese máni Ortalyq - Azııa aımaǵynda oqıǵalar oryn alǵan jaǵdaıda, oǵan qatysý úshin Qazaqstan Respýblıkasy Qurlyq áskerleri bas qolbasshysynyń basshylyǵymen Koalıtsııalyq ásker tobyn (kúshterin) qurý bolyp tabylady.
