Jaýyngerlik korabldegi jalǵyz áskerı qyzmetshi Janar «Batyr arýlarda» baǵyn synamaq (FOTO)
21814 áskerı bólimi «Oral» zymyran-artıllerııalyq korabli baılanysy jaýyngerlik bóliminiń tehnıgi 1-statıa starshınasy Janar Ybyraeva Qarýly Kúshterde 2011 jyldan bastap qyzmet etedi. Ol - jaýyngerlik korablde qyzmet atqaryp júrgen TMD elderi arasynda Qarýly Kúshterdegi jalǵyz áıel.
«Shtabta qurlyqta qyzmet atqaryp júrgen kezimde teńiz, korablderdi, romantıkany ańsadym. Endi «Oral» zymyran-artıllerııalyq korablinde qyzmet atqaryp júrmin, baılanysty ornatamyn. Men korabldegi birden-bir áıel áskerı qyzmetshimin jáne eń basynda qıyndyqtar boldy. Ekıpaj meniń qolymnan kelmeıdi, alyp kete almaıdy jáne eńirep jylaıdy dep oılady. Alaıda, men naǵyz laıyqty áskerı qyzmetshi ekenimdi dáleldeı aldym. Biz eki aptaǵa jaýyngerlik kezekshilikke ashyq teńizge shyǵamyz. Ótken jyly bir aıǵa Mahachkalaǵa baıqaýǵa attandyq. Kásibimdi durys tańdaǵanymda eshqandaı kúmánim joq», - deıdi 1-statıa starshınasy Janar Ybyraeva.
Sondaı-aq, Janar - «Qazaqstan Qarýly kúshterine - 20 jyl» jáne «QR QK ÁTK-ge 20 jyl» medaldarynyń ıegeri jáne korablderimizdiń áskerı qyzmetshileri 2-oryn alǵan «Kaspıı teńizi - 2015» teńiz bıatlony boıynsha halyqaralyq saıystardyń jeńimpazy.
Bıylǵy jyly Janar QR Qorǵanys mınıstrliginiń muryndyq bolýymen ótkizilip jatqan «Batyr arýlar» baıqaýyna qatysýdy uıǵardy. «Óz úlgi-ónegemmen qyzdarǵa armııada, Áskerı-teńiz kúshterinde qyzmet etýge rýhtandyryp, qanat bitiretin shyǵarmyn. Adamdar áskerı qyzmetshi bolý abyroıly ári bedeldi ekenine kóz jetkizedi», - deıdi ol.
Elimizdiń Qarýly Kúshterinde áıel áskerı qyzmetshiler arasynda ekinshi «Batyr arýlar» respýblıkalyq baıqaýy bastaý alǵanyn esterińizge sala keteıik. 25 naýryzǵa deıin nıet bildirgender saýalnamany toltyrýy tıis. Onda ózi jáne QR Qarýly Kúshteriniń qataryndaǵy áskerı qyzmeti týraly áńgimelep berýi abzal. Ekinshi kezeńde 2016 jylǵy sáýirdiń 1-i men maýsymnyń 15-i aralyǵynda ótetin daýys berý arqyly qazaqstandyq armııanyń jıyrma úzdik ókili anyqtalady.
