Jaýyngerlik daıyndyqtyń sapasyna barynsha kóńil bólýimiz kerek - QR Qorǵanys mınıstri
Atalǵan mınıstrliktiń málimetinshe, kún tártibine sáıkes Qarýly Kúshterdiń 2012 jylǵy qyzmetiniń qorytyndysy shyǵarylyp, áskerlerdi materıaldyq-tehnıkalyq qamtamasyz etýdiń jaı-kúıi, jaýyngerlik ázirliktiń sapasyn kóterý, sondaı-aq armııa basshylyq quramynyń áskerı tártip pen quqyqty qamtamasyz etý boıynsha jumysy qaraldy.
Alqa otyrysyn ashqan Qorǵanys mınıstri Ádilbek Jaqsybekov: «Bizdiń basty tapsyrmalarymyzdyń biri áskerlerdiń jaýyngerlik ázirliginiń sapa kórsetkishin arttyryp, kásibı áskerı basqarý korpýsyn qurý, sondaı-aq qater tóndiretin kez kelgen qaýip-qaterlerge saýatty jaýap berý bolyp tabylady»,- dep atap ótti.
Jalpy aǵymdaǵy jyl úzdiksiz jaýyngerlik ázirlikti jetildirý jáne áskerı jattyǵýlardy ótkizý sharalaryna toly boldy. Onyń barlyǵy jańa Áskerı doktrına erejeleriniń talaptaryna sáıkes, kelisilip bekitilgen Qarýly Kúshterdi qoldaný Jospary aıasynda júrgizildi. Basty jumystar jeke quramnyń daıyndyǵyn jetildire túsýge arnalyp «Qarýly Kúshterdiń qurylǵanyna 20 jyl tolýyna - Qazaqstan qaýipsizdigin qamtamasyz etý úshin bizdiń eren eńbegimiz!» atty uranmen sabaqtasty.
Jyl boıy ártúrli deńgeıdegi 80-ge jýyq jattyǵýlar ótkizildi. Qorǵanys mınıstri jaýyngerlik tapsyrmalardy qoıarda jaǵdaıdyń damý stsenarııiniń barlyq múmkindikterin eskerip, qolbasshylyq pen jeke quramdy kez kelgen jaǵdaıǵa ıaǵnı taýly jerde, teńiz jaǵasynda, qala ishinde, kúrdeli aýa raıynda jáne táýliktiń kez-kelgen ýaqytyna beıim bolýǵa oqytýdyń qajet ekenin atap ótti.
Aldaǵy 2013 jylǵy jaýyngerlik jarystyń urany: «Qýatty Armııa - Qýatty Qazaqstan!» dep atalady.
Qorǵanys mınıstri barlyq komandırlerge qaratyp: «Ushý, júrgizý kórsetkishteri kóńil kónshiterlikteı, endi Elbasy - Qarýly Kúshterdiń Joǵarǵy Bas qolbasshysy talap etip otyrǵandaı, jaýyngerlik daıyndyqtyń sapasyna barynsha kóńil bólýimiz kerek»,- dedi.
Bolashaqta ekijaqty jattyǵýlar ótkizýdiń qajettiligine nazar aýdarýǵa salmaq túsire sóılegen Mınıstr jaýyngerlik qımyldar teatryndaǵy naqty jaǵdaıdy seziný úshin shartty qarsylastyń naqty adamdardan quralýyn basa aıtty.
Sonymen qatar, alqa otyrysynda tyldyq qamtamasyz etý, polıgon jabdyqtaryna qyzmet kórsetý, halyqaralyq yntymaqtastyq, jáne áskerı tártip máseleleri de qaraldy. Áskerı tártipke jasalǵan taldaý Qarýly Kúshterde bul taqyrypta aıtarlyqtaı ilgerleý baryn kórsetip berdi.