Jaýyn-shashynǵa baılanysty eskertý 25 naýryzǵa deıin uzartyldy
ASTANA. QazAqparat - Qazaqstannyń basym bóliginde jarııalanǵan jaýyn-shashyn men kóktaıǵaqqa baılanysty eskertý 25 naýryzǵa deıin uzartyldy, dep habarlaıdy QazAqparat tilshisi «Qazgıdromet» RMK-ǵa silteme jasap.
Sınoptıkterdiń habarlaýynsha, 23-25 naýryz kúnderi Qaraǵandy, Aqmola, Soltústik Qazaqstan, Qostanaı jáne Pavlodar oblystarynda jaýyn-shashynnyń túsýine jáne jyly aýa temperatýrasynyń saqtalýyna baılanysty erigen qar sýynyń tasýy, sý basý qaýipteri bar.
23-24 naýryz kúnderi Batys Qazaqstan, Atyraý, Aqtóbe oblystarynda aýa temperatýrasy kóterilip, jaýyn-shashyn túsýine baılanysty erigen qar sýy jınalyp, sý deńgeıi kóterilýi múmkin.
Shyǵys Qazaqstan oblysynda da 23-26 naýryz kúnderi aýa temperatýrasy kóterilip, jaýyn-shashyn keı jerlerde tolassyz jaýyp, muz jabynyna zaqym keltirip, sý tasqynyna ákep soǵýy múmkin.
23-26 naýryz kúnderi Almaty, Jambyl oblystarynda jańbyr jaýady dep kútilýde. Saldarynan sý deńgeıi kóterilip, aǵyn sýlar paıda bolýy múmkin. 23 naýryz kúni Almatyda nóser jańbyr jaýady.
23-25 naýryz kúnderi Ońtústik Qazaqstan jáne Qyzylorda oblystarynda jaýyn jaýyp, aýa temperatýrasy kóterilip, ózen alaptaryn sý basýy múmkin.
Buǵan deıin mereke kúnderi Qazaqstan aýmaǵynyń basym bóliginde jaýyn, qar aralas jańbyr jaýatynyn habarlanǵan edi.
