Jaýyn, kóktaıǵaq, tuman: Demalys kúnderi aýa temperatýrasy odan saıyn tómendeıdi
NUR-SULTAN. QazAqparat - «Qazgıdromet» RMK aldaǵy 19-21 qazan aralyǵyna arnalǵan aýa raıy boljamyn usynady, dep habarlaıdy QazAqparat.
Ótken táýlikterde tsıklondar Batys Sibir arqyly ótkenimen, onymen baılanysty atmosferalyq fronttar Qazaqstandaǵy aýa raıyna óz áserin tıgizdi. Osyǵan baılanysty aldaǵy demalys kúnderi áli de soǵan uqsas sınoptıkalyq jaǵdaı kútiledi.
Respýblıkanyń basym oblystarynda jaýyn-shashyn jaýady. Eldiń soltústik bóliginiń keı jerlerinde kóktaıǵaq bolyp, tuman túsedi.
Soltústik teńiz aımaǵynan kelip jatqan sýyq aýa massalary ári qaraı aýa temperatýrasynyń tómendeýine alyp keledi. Sondyqtan aýa temperatatýrasy ortasha kópjyldyq temperatýradan 3…5°S tómen bolady.
