Jańa Salyq kodeksi: tabysy tómen azamattar JTS-nan bosatylady
ASTANA. KAZINFORM – Jańa Salyq kodeksinde jeke tulǵalar úshin 30 aılyq eseptik kórsetkish (AEK) mólsherinde bazalyq salyqtyq shegerim engiziledi. Bul aıyna 129 750 teńge, ıaǵnı azamat osy somaǵa deıingi tabysyn salyq salynatyn kiristen shegere alady. Jeke tabys salyǵy men áleýmettik salyqtaǵy ózgerister týraly QM Memlekettik kirister komıtetiniń ókili Aıgúl Abbasova tikeleı efır barysynda keńinen túsindirdi.
Osyǵan baılanysty aı saıynǵy tabysy shamamen 145 myń teńge bolatyn azamattar jeke tabys salyǵyn tólemeıdi.
– Bul salyq salýdaǵy ádilettilik qaǵıdatyn iske asyrý. Tabysy tómen azamattar jeke tabys salyǵynan bosatylady, – dedi Aıgúl Abbasova.
Sonymen qatar jańa Salyq kodeksinde joǵary tabys alatyn tulǵalarǵa progressıvti mólsherleme qarastyrylǵan. Jyldyq tabysy 36 mln teńgege deıin (aıyna shamamen 3 mln teńge) jeke tabys salyǵy 10 paıyz mólsherinde saqtalady. Al atalǵan somadan asatyn tabysqa 15 paıyzdyq mólsherleme qoldanylady.
– 36 mln teńgege deıingi jyldyq tabysqa 10 paıyzdyq mólsherleme qoldanylady. Al bul shekten asatyn tabys bóligi 15 paıyzben salyq salynady, – dedi ol.
Aıgúl Abbasovanyń aıtýynsha, buǵan deıin 2025 jyly engizilgen qosymsha salyqtyq shegerimder bilim alý, medıtsınalyq qyzmetter, ıpotekalyq turǵyn úı qaryzdary boıynsha syıaqylar jáne kópbalaly otbasylarǵa arnalǵan jeńildikter azamattar úshin birqatar ákimshilik qıyndyq týdyrǵan.
– Azamattar salyqtyq shegerimderdi qoldaný úshin shyǵyndardy rastaıtyn qujattardy jınap, jyl sońynda deklaratsııa tapsyrýǵa mindetti boldy, – dedi spıker.
Osyǵan baılanysty jańa Salyq kodeksinde barlyq qosymsha shegerimder 30 AEK mólsherindegi biryńǵaı bazalyq shegerimmen almastyrylǵan.
– Endi jeke tulǵalar eshqandaı rastaıtyn qujatsyz-aq tabysyn 30 AEK-ke azaıta alady. Eger basqa negizder bolmasa, deklaratsııa tapsyrý mindeti de bolmaıdy, – dep túsindirdi Aıgúl Abbasova.
Spıkerdiń aıtýynsha, bul ózgerister jeke tulǵalar úshin de, salyq organdary úshin de protsesti edáýir jeńildetip, ákimshilik júktemeni azaıtady.
Eske salsaq, Májilistiń jalpy otyrysynda Qarjy mınıstri Mádı Takıev aldaǵy úsh jyldyq bıýdjetin tanystyrǵan edi. Ol ózinde el ekonomıkasynyń ósimine, jańa Salyq kodeksiniń qabyldaýyna, onyń ishinde salyqtyq jáne kedendik ákimshilendirýge baılanysty kiris bıylmen salystyrǵanda 3,6 trln teńgege ulǵaıyp otyr. Bul memlekettik qarjynyń turaqtylyǵyna ákeledi dep aıtqan edi.