Jáýtikov olımpıadasynda 8 jyldan beri qazaqstandyq oqýshylar medal sany boıynsha kósh bastaýda
ALMATY. 15 qańtar. QazAqparat - Halyqaralyq Jáýtikov olımpıadasynda O.Jáýtikov atyndaǵy respýblıkalyq mamandandyrylǵan daryndy balalarǵa arnalǵan fızıka-matematıka orta mektep-ınternatynyń oqýshylary ótken 8 jylda 20 altyn, 29 kúmis, 56 qola medal jeńip aldy.
Bıyl toǵyzynshy ret uıymdastyrylyp otyrǵan bul sharaǵa Qazaqstannan qatysyp otyrǵan 18 komandanyń tórteýi atalmysh bilim ordasynan. Bireýi el quramasy, ekeýi Almaty qalasynyń, altaýy Astana, Qaraǵandy, Qostanaı, Óskemen, Pavlodar qalalary men Nazarbaev zııatkerlik mektebiniń quramalary. Budan bólek Astanadaǵy "Zerde" daryndy balalar mektebi, Almatydaǵy №171 lıtseı, Aqtóbedegi qazaq-túrik lıtseıi, Taldyqorǵandaǵy №20 daryndy balalarǵa arnalǵan arnaıy lıtseı men Ońtústik Qazaqstan oblysyndaǵy Kaparov mektebi óz komandalaryn qosyp otyr.
Uıymdastyrýshylardyń aıtýynsha, O.Jáýtikov atyndaǵy respýblıkalyq mamandandyrylǵan daryndy balalarǵa arnalǵan fızıka-matematıka orta mektep-ınternatynyń oqýshylary Jáýtikov olımpıadasyndaǵy medaldarynyń jalpy sany jaǵynan birinshi bolǵanymen sapasy jaǵynan ekinshi orynda tur. Birinshi orynda Máskeý qalasynyń SÝNTs komandasy kele jatyr. Olar segiz jylda 22 altyn, 15 kúmis, 7 qola medaldyń ıegeri atanǵan.
Bıyl bul dodaǵa qatysyp otyrǵan 53 komandany 18-i Qazaqstannan, 8-i Reseıden, altaýy Mońǵolııadan, Grýzııa men Tájikstannan tórt-tórtten, úsheýi Qyrǵyzstannan, Ázirbaıjan, Indonezııa, Túrikmenstannan eki-ekiden, bireýi Rýmynııadan. Al 348 oqýshynyń 223-i Qazaqstannan, 125-i ózge shet elderden kelip otyr.
