Jaýyn-shashyn shaqyrý tájirıbesi Qazgıdromettiń baqylaýynda — Mansur Oshýrbaev
ASTANA. KAZINFORM — Qazaqstanda bulttarǵa áser etý arqyly jaýyn-shashyn shaqyrýǵa qatysty júrgizilip jatqan eksperıment halyqaralyq uıymdardyń qatysýymen baqylanyp otyr. Bul týraly Ekologııa jáne tabıǵı resýrstar vıtse-mınıstri Mansur Oshýrbaev Májilis kýlýarynda málim etti.
Onyń aıtýynsha, tájirıbe Dúnıejúzilik meteorologııalyq uıym ókilderimen birlesip júrgizilgen. Eksperımentti Qazaqstan tarapynan Qazgıdromet baqylaýǵa alǵan.
— Bul másele tolyqtaı Qazgıdromettiń baqylaýynda. Bizdiń tarapymyzdan tek meteorologııalyq derekterge, sonyń ishinde bulttardyń ylǵaldylyǵyna qatysty jumystar qarastyrylady, — dedi vıtse-mınıstr.
Sonymen qatar ol ekologııalyq turǵydan jaýǵan jaýyn-shashynǵa tolyq taldaý júrgiziletinin atap ótti.
— Jalpy, álemdik tájirıbe kórsetip otyrǵandaı, bul — ekologııalyq turǵydan taza tásil. Ol tek sý aıdyndaryndaǵy sý kólemin tolyqtyrýǵa múmkindik beredi, — dedi Mansur Oshýrbaev.
Eske salsaq, Túrkistan oblysynda jaýyn-shashyn jasandy jolmen jaýatynyn jetkizgen edik. Qazaqstan óńirde tehnologııany paıdalanǵan alǵashqy el bolmaq.
Osy rette Prezıdent Qasym-Jomart Toqaev BUU-nyń arnaýly mekemesi sanalatyn Dúnıejúzilik meteorologııa uıymy klımat, aýa raıy, sý resýrstary jáne tabıǵı apattardyń qaterin azaıtý baǵytyndaǵy jahandyq yntymaqtastyqty ilgeriletýde negizgi ról atqaratynyn aıtqan edi.
