Jaýyn-shashyn men daýyl: Almatyda kommýnaldyq qyzmet kúsheıtilgen rejımge kóshti
ALMATY. KAZINFORM – Almatyda jaýyn-shashynǵa baılanysty kommýnaldyq jáne tótenshe jaǵdaılar qyzmeti qosymsha kúsh pen tehnıkany ázirledi.
Almaty ákimdiginiń málimetinshe, jergilikti jerlerde sý jınalyp, sý basý qaýpiniń aldyn alý jáne qajet bolǵan jaǵdaıda onyń saldaryn jedel joıý úshin quramynda 416 jol jumysshysy bar 70 jedel brıgada kezekshilikke shyqty. 252 arnaıy tehnıka, 48 motopompa jáne 18 assenızatorlyq mashına daıyn tur.
Assenızatorlyq mashınalar sý basýy múmkin ýchaskelerge aldyn ala ornalastyryldy. Sonymen qatar 2,4 myń qum salynǵan qap daıyndaldy.
«Qazgıdromet» RMK boljamyna sáıkes, 1 qazanda saǵat 18:00-den keıin Almatyda qarqyny 1-2 mm bolatyn azdaǵan jańbyr jaýyp, naızaǵaı oınaýy múmkin. 2 qazanǵa qaraǵan túni jáne saǵat 09:00-ge deıin keı ýaqytta qarqyny 2-4 mm jańbyr jaýady dep boljanyp otyr. Ońtústik-batystan soǵatyn jeldiń ekpini sekýndyna 15 metrge deıin jetýi múmkin.
- Jaýyn-shashyn kezeńinde qala qyzmetteriniń kezekshiligi kúsheıtildi. Almaty qalasynyń Qutqarý qyzmeti bir assenızatorlyq mashına men 15 motopompa daıyndady. Tótenshe jaǵdaılar departamenti tarapynan 240 adam, 53 arnaıy tehnıka jáne 54 motopompa jumyldyrylady, - dep habarlady ákimdikten.
Kezekshi brıgadalar sý jınalýy múmkin ýchaskelerdi baqylaýda ustamaq. Qajet bolǵan jaǵdaıda sýdy soryp shyǵarý jáne jergilikti jerlerdi sý basýdyń aldyn alýǵa baǵyttalǵan basqa da jumystar jedel júrgiziledi.
Eske salaıyq, buǵan deıin Qazaqstannyń birqatar óńirinde jańbyr, naızaǵaı, tuman jáne qatty jel kútiletinin jazǵanbyz.
