Jaýyn-shashyn kóbeıedi: Túrkistan oblysynda kóktemgi sý tasqynyna daıyndyq qalaı
TÚRKІSTAN. KAZINFORM — Kóktemgi sý tasqyny kezeńin qaýipsiz ótkizý maqsatynda Túrkistan oblysynda keshendi daıyndyq sharalary kúsheıtildi.
«Qazgıdromet» RMK-nyń aldyn ala gıdrologııalyq boljamyna sáıkes, bıylǵy kóktemde elimizdiń basym bóliginde jaýyn-shashyn mólsheri klımattyq normadan joǵary bolady.
Vedomstvo málimetinshe, Túrkistan oblysy sý tasqyny qaýpi ortasha deńgeıdegi óńirler qatarynda tur.
Oblystyq Tótenshe jaǵdaılar departamentiniń habarlaýynsha, óńirdegi gıdrologııalyq jaǵdaı turaqty. Qazirgi tańda ózenderde muz keptelisteri tirkelmegen, sý deńgeıi qalypty rejımde. Bul faktorlar qys-kóktem mezgilin baqylaýda ustaýǵa múmkindik berip otyr.
— «Qazgıdromet» ortalyǵynyń boljamyna sáıkes, aqpan aıynda aýa temperatýrasy -3,8 ben +4,1 gradýs aralyǵynda qubylady. Jaýyn-shashyn mólsheri oblystyń kóp bóliginde klımattyq normaǵa jýyq, al taýly jáne taý bókterindegi aýdandarda normadan joǵary bolýy yqtımal. Osyǵan baılanysty sý tasqyny qaýpi bar aýmaqtarda aldyn alý sharalary jedeldetildi, — dep málimdedi oblystyq TJD.
Qazirgi ýaqytta Túrkistan oblysynda barlyǵy 42 sý qoımasy jumys isteıdi. Onyń 16-sy respýblıkalyq, 22-si oblystyq, al 4-eýi jeke menshikke tıesili. Sý qoımalarynyń ortasha tolý deńgeıi 59 paıyzdy kórsetti. Sondaı-aq oblys aýmaǵyndaǵy 120 ózende, onyń ishinde 5 iri ózende sý deńgeıi ortasha deńgeıden tómen qalyptasqan.
Sý tasqyny qaýpin azaıtý maqsatynda «2025-2026 jyldarǵa arnalǵan qys-kóktemgi sý tasqynyna qarsy ınjenerlik is-sharalar jospary» bekitilgen. Jospar aıasynda 12 is-shara kózdelip, búgingi tańda onyń 8-i tolyq oryndalǵan. Qalǵan jumystar belgilengen kestege sáıkes jalǵasyp jatyr.
— Tótenshe jaǵdaı týyndaǵan jaǵdaıda jedel áreket etý úshin óńirde 1000-nan astam qutqarýshy, 120-dan asa arnaıy tehnıka, júzý quraldary, sý sorǵysh qondyrǵylar jáne evakýatsııaǵa arnalǵan kólikter tolyq daıyndyqqa keltirilgen, — dedi vedomstvo ókilderi.
Injenerlik qorǵanys baǵytynda birqatar naqty joba júzege asyryldy. Atap aıtqanda, Báıdibek aýdanyndaǵy oblystyq mańyzy bar avtojol kópirlerine kúrdeli jóndeý júrgizildi, Boraldaı ózeniniń qorǵanys dambasy betondandy, Keles ózeniniń arnasy nyǵaıtyldy. Al Maqtaaral aýdanynda ırrıgatsııalyq júıeler qalpyna keltirilip, avtojol ótkelderi keńeıtildi.
Sonymen qatar, sý tasqyny qaýpi bar ýchaskelerdi uzaq merzimdi qorǵaý maqsatynda 22 is-sharany qamtıtyn «2026-2027 jyldarǵa arnalǵan sý tasqynyna qarsy jol kartasy» ázirlený ústinde.
Sala mamandarynyń aıtýynsha, kóktemgi sý tasqyny kezeńin qaýipsiz ótkizýge baǵyttalǵan barlyq jumys turaqty baqylaýda, al jaǵdaıdyń ózgerýine baılanysty jedel sheshim qabyldaýǵa qajetti resýrstar tolyq qamtamasyz etilgen.
Budan buryn 5 oblysta sý tasqynyna qarsy kúres sharalaryn kúsheıtý qajet bolyp turǵanyn jazǵan edik.