Jaýyn táýliktik normadan asyp túsken: Shymkent kóshelerin sý basty
ASTANA. KAZINFORM — Qazir megapolıste jaýyn-shashyn saldaryn joıý jumysy júrgizilip jatyr, dep habarlaıdy Shymkent qalasy ákiminiń baspasóz qyzmeti.
Nóser jańbyrdyń saldarynan qysqa ýaqyt ishinde qala aýmaǵynda táýliktik mólsherden asatyn jaýyn-shashyn tústi. Osyǵan baılanysty qalanyń kommýnaldyq qyzmetteri kúsheıtilgen rejımde jumys istep jatyr.
Jaýyn-shashyn áli de jalǵasyp jatqanyna qaramastan, mamandar kóshelerde, turǵyn úılerdiń aýlalarynda jáne sý jınalǵan ýchaskelerde jınalǵan sýdy sorý jumysyn júrgizýde. Bul jumysqa barlyq kommýnaldyq kásiporyndardyń brıgadalary, arnaıy tehnıka jáne Tótenshe jaǵdaılar departamentiniń qyzmetkerleri jumyldyrylǵan.
Sonymen qatar, sýdyń kedergisiz aǵýyn qamtamasyz etý úshin nóser kárizderi men aryq júıelerin tazalaý jumysy qatar atqarylyp jatyr. Qala ákimi men orynbasarlary jáne aýdan ákimderi men tıisti basqarma basshylary da mamandarmen birge jaýyn-shashyn saldaryn joıý sharalaryna atsalysyp jatyr.
— Jaǵdaı turaqty baqylaýda. Sýdy jedel shyǵarý jáne ahýaldy turaqtandyrý úshin barlyq qajetti shara qabyldanýda, — delingen habarlamada.
Budan buryn 10 naýryzda eldiń birneshe óńirinde aýa raıy -33°S-qa deıin kúrt sýytatyny málim boldy.
