Jaýapty operator aýyl sharýashylyǵy taýar óndirýshilerine tıisti arzan dızeldi ózi satqan

NUR-SULTAN. QazAqparat - Qarjy monıtorıngi agenttigi aýyl sharýashylyǵy taýar óndirýshilerine arzandatylǵan dızel otynyn jetkizýge jaýapty operatordyń biri 2,2 myń tonna kóleminde dızel otynyn ózi satyp jibergeni anyqtaldy, dep habarlaıdy QazAqparat.

Memleket basshysynyń tapsyrmasyn oryndaý maqsatynda Qarjy monıtorıngi agenttigi munaı ónimderin zańsyz eksporttaý men alypsatarlyqqa tosqaýyl qoıý jumystaryn jalǵastyrýda.

Júrgizgen jedel-izdestirý is-sharalary barysynda aýyl sharýashylyǵy taýar óndirýshilerine arzandatylǵan dızel otynyn jetkizýge jaýapty operatordyń biri monopolııalyq jaǵdaıdy teris paıdalanǵany anyqtady.

Máselen, 2020-2021 jyldary jalpy kólemi 12,5 myń tonnadan astam tómendetilgen baǵamen dızel otynyn alǵan JShS aýylsharýashylyq taýar óndirýshilerine 10,3 myń tonnasyn jetkizgen. Al qalǵan 2,2 myń tonna kóleminde dızel otynyn JShS-ǵa tıesili janar-jaǵarmaı quıý stantsııalary jelisi arqyly satyp, 74,4 mln teńge qosymsha kiris alǵan.

Atalǵan fakti boıynsha sotqa deıingi tergeý bastaldy.

Foto: economictimes.indiatimes.com