Jaýapty mınıstrlikter balalardy býllıngten qorǵaý boıynsha jumysty kúsheıtýi qajet - Bektenov
ASTANA. KAZINFORM – Jazǵy demalys kezinde jastardy zańsyz áreketke tartý qaýpi arta túsedi. Bul týraly búgin Úkimet otyrysynda Premer-mınıstr Oljas Bektenov málim etti.
- Qoǵamdyq tártipti qamtamasyz etý, jol-kólik oqıǵalary men tótenshe jaǵdaılardyń aldyn alýǵa tartylǵan barlyq qyzmetter men bólimshelerdiń is-qımylyn naqty úılestirý qajet. Іshki ister, Tótenshe jaǵdaılar mınıstrlikteri ákimdiktermen birge balalar men jastar kóp jınalatyn oryndarda patrýldeýdi uıymdastyryp, mektep bitirý is-sharalary kezeńinde, balalar ortalyqtary men saýyqtyrý uıymdaryna polıtsııa qyzmetkerlerin bekitip qoıýy qajet. Balalar lagerleriniń jetekshilerimen, nusqaýshylarmen jáne tárbıeshilermen qaýipsizdik sharalary týraly túsindirý jumystaryn júrgizip, demalýshylardy evakýatsııalaý jáne qutqarý boıynsha jattyǵýlar ótkizińizder. Jazǵy demalys kezinde jastardy zańsyz áreketke tartý qaýpi arta túsedi. Kámeletke tolmaǵandardy qylmys tuzaǵyna tartatyndarǵa bultartpas jaza qoldanýdy qamtamasyz etý qajet. Qoǵam men áleýmettik jelilerdegi kez kelgen dabylǵa dereý jaýap berý kerek, - dedi O. Bektenov.
Onyń paıymynsha, balalardyń tsıfrlyq qaýipsizdigi erekshe nazar aýdarýdy talap etedi.
- Oqý-aǵartý, Іshki ister jáne Aqparat mınıstrlikteri balalardy ınternet-alaıaqtyqtan, býllıngten, quqyqqa qaıshy kontentten jáne ózge de destrýktıvti áserden qorǵaý boıynsha profılaktıkalyq jumysty kúsheıtýi qajet. Tótenshe jaǵdaılar mınıstrligi ákimdiktermen birge 1-shi maýsymǵa deıin sý aıdyndaryn, jaǵajaılardy, basseınderdi jáne týrıstik aımaqtardy tekserip shyqsyn. Qutqarý jabdyqtarynyń bolýyn qamtamasyz etip, personaldy alǵashqy kómek kórsetý jáne qutqarý daǵdylaryna oqytýdy uıymdastyrsyn, - dedi Úkimet basshysy.
Budan buryn habarlanǵandaı, oqýshylardyń jazǵy demalysy ortalyqtaryna polıtsııa ınspektorlary bekitildi.
