Jaýapsyz PIK-terdiń tizimi jasaldy
NUR-SULTAN. QazAqparat - Elordanyń qalalyq monıtorıng jáne jedel áreket etý ortalyǵynyń basshysy Jannat Dýbırova jumystaryna jaýapsyz Páter ıeleriniń kooperatıvi (PIK) tizimi týraly aıtyp berdi, dep habarlaıdy QazAqparat tilshisi.
Onyń aıtýynsha, búginde iKomek qyzmetine kún saıyn 12 000 końyraý túsedi. Budan bólek, mobıldi qosymshalar men chat-bot arqyly aryz-shaǵymdar kóptep túsip turady. Osynyń nátıjesinde qala boıynsha barlyq problemalardy kórýge bolady.
«Biz barlyq jaǵdaıǵa analıtıka jasap, kórip otyrmyz. Halyqtan túsken aryz-shaǵymdardyń negizinde júıeli problemalardyń reıtıngi jasaldy. Qaı PIK nashar jumys isteıdi? Lıft kompanııalary da solaı. Sóıtip, kim jaqsy jáne kim jaman jumys jasap otyrǵanyn kórip otyramyz. Osy taldaýdyń bári ákimdikke beriledi. Olar óz kezeginde tıisti sharalardy qolǵa alady», - dedi J.Dýbırova QazAqparat tilshisine bergen suhbatynda.
Ortalyq basshysynyń sózine qaraǵanda, qazirgi kezde tek ákimdik qyzmetkerleri - ákimder, olardyń orynbasalary men basqarma basshylary ǵana júıege kirip, barlyq málimetterdi kóre alady. Degenmen, aldaǵy ýaqytta ol málimetterdiń bárin ashyq portalda jarııalaý josparlanyp otyr. «Máselen, búginde PIK-terdiń tizimi bar. Onda óz qyzmetine jaýapty jáne jumysty nashar isteıtin kompanııalardyń barlyǵy kórsetilgen. Dál qazir men olardyń bárin ataı almaımyn. Degenmen, aldaǵy ýaqytta halyq barlyq aqparatty kóre alady. Qazirgi kezde biz arnaıy portaldy ázirlep jatyrmyz. Sol jerde barlyq aqparat jarııalanady. Shamamen, mamyr aıynda ol portal iske qosylady», - dep atap kórsetti J.Dýbırova.
Aıta keteıik, iKomek ortalyǵynyń operatorlary aryz-shaǵymdardy barlyq baılanys arnalary arqyly qabyldaıdy. Sonyń ishinde www.astana.gov.kz saıty, WhatsApp nómiri: +77471090109, Telegram chat-boty: iKOMEK 109 mobıldi qosymshasy (PlayMarket nemese Apple store ), «Smart Astana» mobıldi qosymshasy (PlayMarket | AppStore), 109@ikomekastana.kz elektrondyq mekenjaıy, sondaı-aq, 109 tegin qońyraý shalý nómiri bar.
