Jaýapsyz kásipkerlerdiń kesirinen aýyl turǵyndary sýǵa muqtaj bolyp otyr – Memleket basshysy
«Búginde 700 myńnan astam turǵyny bar 1 922 aýyl taza aýyz sýǵa zárý bolyp otyr. Qostanaı oblysy turǵyndarynyń 35 paıyzy, Shyǵys Qazaqstan, Jambyl jáne Soltústik Qazaqstan oblystary turǵyndarynyń 20 paıyzǵa jýyǵy sapasyz sý iship otyr. Sýdy tutyný kólemi artqan saıyn sý ınfraqurylymy da eskirip bara jatyr. Elimiz boıynsha sýmen qamtamasyz etetin nysandardyń 22 paıyzdan astamy tozǵan. Atap aıtqanda, Almaty qalasynda 58 paıyz, Shyǵys Qazaqstan oblysynda 42 paıyz, Jambyl oblysynda 36 paıyz, Qaraǵandy oblysynda 34 paıyz. Jaýapsyz kásipkerlerdiń kesirinen aýyl turǵyndary sýǵa muqtaj bolyp otyr. Mundaı derekter jıilep ketti. Ókinishke oraı, buǵan jergilikti atqarýshy organdar jol berýde. Mysaly, Túrkistan oblysynda bir kólik Ekpindi jáne Qorǵan aýyldarynyń turǵyndaryna arnalǵan aýyz sýdy demalys oryndary basseındi toltyrý úshin paıdalanǵan. Sóıtip, halyqqa sý bermeı qoıǵan. Buǵan tıisti baqylaý jasamaǵan jergilikti bılik kináli», - dedi QR Prezıdenti Úkimettiń keńeıtilgen otyrysy barysynda.
Memleket basshysynyń atap ótýinshe, aýyz sýdyń tapshylyǵyna jer qoınaýyn paıdalanýshylardyń áreketi de sebep bolyp otyr. Ken oryndaryn ıgerý kezinde aýyl turǵyndaryn sýmen qamtamasyz etip otyrǵan ózender tartylyp, bulaqtar sarqylyp jatyr.
«Mundaı jaǵdaıǵa Batys Qazaqstan, Aqmola jáne Túrkistan oblystary da tap bolýda. Úkimetke oblys ákimderimen birlesip, osyndaı derekterdi túgel anyqtap, tıisti sharalar qabyldaýdy tapsyramyn. Sondaı-aq bolashaqta oǵan jol bermeý úshin baqylaý júıesin ázirleý qajet. Tıisti ulttyq joba aıasynda sýmen qamtamasyz etý máseleleri keshendi túrde sheshiledi dep senemin»,- Qasym-Jomart Toqaev.
