Jaýapkershiligi joǵary ınvestorlarǵa qosymsha salyqtyq jeńildikter berilmek
ASTANA. KAZINFORM – Ulttyq ekonomıka mınıstrligi sapaly ınvestıtsııa ákeletin jaýapkershiligi joǵary ınvestorlarǵa qosymsha qandaı jeńildikter berilýi múmkin ekendigin aıtty.
— Búginde qoldanystaǵy zańnama Qazaqstan Respýblıkasynyń Kásipkerlik kodeksine sáıkes ınvestıtsııalyq jobalardy tabysty iske asyrý úshin memlekettik qoldaýdyń keń spektrin usynady. Kodekske sáıkes memlekettik qoldaý sharalary ınvestıtsııalyq jobany nemese ınvestıtsııalyq basym jobany iske asyrýǵa arnalǵan ınvestıtsııalyq kelisimshart, arnaıy ınvestıtsııalyq kelisimshart jáne ınvestıtsııalar týraly kelisim aıasynda usynylady, — dedi vedomstvodan agenttik saýalyna oraı.
Mınıstrliktiń atap ótýinshe, jobanyń ereksheligine jáne ınvestıtsııalar kólemine baılanysty ımportqa kedendik bajdar men qosymsha qun salyǵy, korporatıvtik tabys salyǵy, jer men múlikke salynatyn salyqtardy salýdan bosatý, zańnama ózgergen kezde memlekettik zattaı granttar men turaqtylyq berý kózdeledi.
— Jer qoınaýyn paıdalaný salasyndaǵy jobalar úshin ınvestıtsııalyq ahýaldy jaqsartý maqsatynda jańa tetik — jetildirilgen modeldik kelisimshart qoldanysqa engizildi. Ol teńizdegi de, qurlyqtaǵy da, onyń ishinde gaz jobalary úshin birqatar preferentsııa usynady. Bul tetik kúrdeli munaı-gaz jobalary úshin retteýshi jáne fıskaldyq preferentsııalardy kózdeıdi. Sondaı-aq, Úkimet salyqtyq shegerimder arqyly ınfraqurylym qurylysyna ınvestordyń shyǵyndaryn óteý boıynsha qoldaýdyń jańa quralyn pysyqtaýda. Búgingi tańda kásipkerlik jáne Salyq kodeksterine tıisti zańnamalyq túzetýler ázirlendi. Túzetýlerge sáıkes ınvestıtsııalyq jobany iske asyrý úshin ınfraqurylym obektilerin salýǵa jumsalatyn naqty shyǵystar somasynan eseptelgen ınvestıtsııalar týraly kelisim jáne (nemese) ınvestıtsııalyq kelisimshart jasasqan ınvestordyń salyq mindettemeleri jeńildikti salyq kezeńi aıaqtalǵannan keıin azaıtylýy múmkin, — dedi mınıstrlikten.
Esterińizge sala ketsek, osy jyldyń qańtarynda ótken Úkimettiń keńeıtilgen otyrysynda Memleket basshysy Qasym-Jomart Toqaev sapaly ınvestıtsııa ákeletin jaýapkershiligi joǵary ınvestorlarǵa qosymsha jeńildikter berý máselesin qarastyrýdy tapsyrǵan edi.