Jaýapkershilikti arttyrýdyń birden-bir joly jazanyń qataıtylýy -májilismen B. Smaǵul
Bul pikirin búgin Almatyda QR UQK Shekaralyq qyzmet akademııasynyń oqýshylarymen bolǵan kezdesý barysynda QR Parlament Májilisiniń depýtaty Baqytbek Smaǵul bildirdi.
«Jaýapkershilikti sezinbeý oǵan qoldanylatyn jazanyń jeńildiginen. Jaza qatal bolsa kez kelgen adam salǵyrttyq pen nemquraıdylyqtan arylyp, odan tıyla bastaıdy. Al eshqandaı jaýapkershilik bolmasa jáne bul úshin eshqandaı jaza qoldanylmasa ol údeı bereıdi. Bizde qazir qoǵamnyń barlyq salasynda jaýapkershilik kemshin túsip jatyr. Sondyqtan bul jáıttar Elbasynyń «Qazaqstannyń áleýmettik jańǵyrtylýy: Jalpyǵa Ortaq Eńbek Qoǵamyna qaraı 20 qadam» baǵdarlamasynda jan-jaqty sóz bolyp otyr», - deıdi B. Smaǵul.
Májilismenniń aıtýynsha, qoǵamnyń qarapaıym múshelerine jáne olardyń múddesin qorǵaýǵa tıisti Úkimet músheleri men ákimderge qoldanylatyn jazanyń arasynda úlken aıyrma bolý kerek. Atqarý organdarynyń ókilderi óz isine salǵyrttyq tanytsa oǵan qoldanylatyn jaza qatań bolýy tıis. Qazirgi jaza ony aýyzdyqtaýǵa jetkiliksiz. Jemqorlyq pen sybaılastyq dertiniń bir ushyǵy osynda jatyr.
