Jaýapkershilikpen, tózimmen áreket etetin ýaqyt týdy – ardagerler keńesiniń tóraǵasy
TÚRKІSTAN. QazAqparat - Tórtkúl dúnıeni dúr silkindirgen aýyr indetti aýyzdyqtaý – osy kúngi basty másele. Túrkistan oblystyq ardagerler keńesiniń tóraǵasy Jeńisbek Máýlenqulov osyndaı pikirin bildirdi, dep habarlaıdy QazAqparat.
«Jaýapkershilikpen, tártippen, tózimmen áreket etetin ýaqyt týdy. Elbasy kúlli Qazaqstan jurtshylyǵyn Memleket basshysynyń jáne Úkimettiń qabyldaǵan sheshimderine qurmetpen qarap, qoldaý kórsetýge shaqyrdy. Osyndaı qıyn kezeńde eldegi iri kásipkerler shamasy kelgenshe aýrýmen kúresý jolyna kómek kórsetý qajettiligin aıtty. Arnaıy qor qurý týraly usynys bildirip, ondaǵy jıylǵan qarajat aýrýdyń aldyn-alý jumystaryna baǵyttalý kerektigin jetkizdi», - deıdi J.Máýlenqulov.
Onyń aıtýynsha, qamqorlyq kórsetýge daıyn turatyn túrkistandyqtar qashanǵy ádetinen tanbaı, Elbasynyń úndeýine qoldaý bildirip, Arys oqıǵasy kezinde qajetke jaraǵan «Túrkistan» qoryna kásipkerler qarjylaı kómekterin aýdara bastaǵan.
«Basqa sala mamandary da qol qýsyryp qarap otyrmaı, bir kúngi jalaqylaryn sol qorǵa tabystady. Bul úrdistiń áli de jalǵasyn jemisti tabaryna men senemin.
Biz, osylaısha qanymyzǵa sińgen qasterli qasıetimiz arqyly, judyryq bolyp jumylyp, bul indetti aýyzdyqtaı alatynymyzǵa senemin. Sonymen qatar, barlyq Qazaqstan jurtshylyǵyn ıgilikti iske atsalysýǵa shaqyramyn!», - dep túıindedi ol.
