«Jaýapqa tartylyp, qatań jazasyn alady»: Toqaev áskerı qyzmetshilerge eskertý jasady
ASTANA. KAZINFORM — Prezıdent oqý-jattyǵý jıynyna qatysqan áskerı qyzmetshiler tıisti jabdyqtarmen, sonyń ishinde arnaıy qutqarý keýdeshelerimen qamtamasyz etilmegenin aıtty.
Memleket basshysy jeke quramnyń qaýipsizdigine aıryqsha nazar aýdardy.
Qasym-Jomart Toqaevtyń pikirinshe, Úkimettik komıssııa oqý-jattyǵýdy ázirleý men ótkizýge, áskerdi qajetti jabdyqtarmen qamtamasyz etýge jáne qaýipsizdik talaptardyń saqtalýyna jaýapty barlyq laýazymdy tulǵanyń áreketine baǵa berýge tıis.
Budan bólek, Prezıdenttiń ókimine sáıkes Qorǵanys mınıstrligindegi isterdiń jaı-kúıine keshendi tekserý bastaldy.
Tekserý barysynda áskerı qyzmetti uıymdastyrý, áskerdi jabdyqtaý, sondaı-aq onyń materıaldyq jáne qarjylyq turǵydan qamtamasyz etilýi jan-jaqty zerdelenedi.
Qaýipsizdik Keńesi Tóraǵasynyń orynbasary Aıda Balaeva basqaratyn komıssııa júıeli sıpat alǵan zań buzýshylyqtardy anyqtap, kimderdiń jaýapqa tartylatynyn aıqyndaýy qajet.
Memleket basshysy áskerı qyzmetshiler laýazymyna, shenine qaramastan jaýapqa tartylatynyn, zań boıynsha qatań jazasyn alatynyn eskertti. Atalǵan másele Prezıdenttiń jeke baqylaýynda.
— Bul oqıǵa armııada olqylyqtar óte kóp ekenin jáne kásibılik jetispeıtinin anyq kórsetti. Áskerdi túbegeıli reformalaýdy iske asyratyn ýaqyt keldi. Bul — kezek kúttirmeıtin másele. Men osyǵan baılanysty kadrlyq sheshimder qabyldadym. Sizderge Qazaqstan Respýblıkasynyń jańa Qorǵanys mınıstri Myrzahmetov Aıdos Sákenulyn tanystyrǵym keledi. Aıdos Sákenuly kúrdeli kezeńde qyzmetke kirisip jatyr. Jaýapkershilik — óte joǵary, aldaǵy mindetter — asa kúrdeli. Batyl sheshimder qabyldanýǵa tıis, — dedi Memleket basshysy.
Qasym-Jomart Toqaev qorǵanys vedomstvosynyń jumysyn túbegeıli transformatsııalaý máselesine toqtaldy.
– Jaqynda Qaýipsizdik Keńesi Apparatymen ótken jıynda áskerı salada atqarylatyn basym mindetterdi aıqyndadym. Bizdiń armııa ótken ǵasyrda qalyp qoıǵan. Sonymen qatar qolbasshylyq júıesin halyqaralyq úzdik tájirıbege saı qaıta qurý kerek. Keshendi tásil qoldaný qajet. Al ol úshin baǵyt-baǵdarymyz anyq bolǵany jón. Bul dúnıetanymy keń, saýatty ofıtserlerdiń ǵana qolynan keledi. Reformanyń maqsaty – jańa úlgidegi ásker jasaqtaý, – dedi Memleket basshysy.
Prezıdent armııada tsıfrlyq transformatsııa júrgizýdi, múmkindiginshe adamdy tehnologııamen almastyrýdy tapsyrdy.
– Áskerdi damytýdyń jańasha tásilderi qajet. Taptaýryn sheshimder, aldamshy amaldar, qaǵaz júzinde bárin keremet etip kórsetetin ótirik esepter eshkimge qajet emes, – dedi Prezıdent.
Eske salaıyq, buǵan deıin Prezıdent Dáýren Qosanovty Qorǵanys mınıstri laýazymynan bosatqanyn habarlaǵan edik.
Onyń ornyna Aıdos Myrzahmetov Qorǵanys mınıstri bolyp taǵaıyndaldy.
Prezıdent jańa mınıstrge áskerı basqarý júıesin jetildirýdi tapsyrdy.
