«Jaý júrek myń balada» jońǵardyń rólin somdaǵan túrkııalyq qazaq
ASTANA. QazAqparat - Bahadyr Hákim - Túrkııa qazaqtarynyń arasynan shyqqan akter. 2002 jyldan beri birneshe fılm men serıaldarǵa túsken, «TRT-Avaz» telearnasynda segiz jyl boıy kórsetilgen «Túrkııanyń qazaqtary» atty baǵdarlamanyń prodıýseri. «Astana aqshamy» qandasymyzdan alynǵan suhbatty jarııa etti. «QazAqparat» atalǵan suhbatty yqshamdap, oqyrman nazaryna usynady.
- Bahadyr, kıno ónerine qalaı keldiń?
- Kezdeısoq. Ol kezde akterlik bilimim joq edi, eshqandaı kastıngke de qatyspadym. Bir jerde tanymal túrik rejısseri Osman Synavpen kezdesip qaldym. Ózi túsirip jatqan serıalǵa shaqyrdy. Osylaısha kıno ónerine qadam bastym.
- Oǵan deıin nemen aınalysqan ediń?
- Teri ıleý - Ystambul qazaqtarynyń kásibi. Biz de sonymen nápaqa aıyryp júrdik.
- Otbasyńda ónerge den qoıǵandar bar ma edi?
- Joq. Jalǵyz anam - zeınetker. Akterlikke burynnan qyzyǵýshy edim, inim ekeýimiz bala kezimizde ózimizshe kórgen fılmderimizdi salatynbyz. Al, Túrkııa qazaqtarynan marqum Mustafa Óztúrik pen ákesiniń birneshe fılmge túskenin bilemin.
- Seni alǵash ret 2003 jyly, stýdent kezimde tanymal fılmi «G.O.R.A-da» kórdim. Sol kezden beri ylǵı qytaı, japondardyń rólderinde oına ı syń. Qashan «qazaq bolasyń»?
- Iá, birneshe fılm jáne serıaldarda shyǵys azııalyq turpattaǵy rólder tıip júr. Atajurtymda túsirilgen «Jaý júrek myń bala» fılminde de jońǵar bolyp oınadym.
Shamasy, ózim fılm túsirip, ózime-ózim qazaq rólin beretin shyǵarmyn.
- Ondaı jospar bar ma?
- Aldaǵy jazda sondaı bir isti qolǵa alý oıda bar. Qazir stsenarııin jazyp jatyrmyz. Ekshn-komedııa bolmaq.
- Seni Túrkııada tanymal qylǵan qaı fılm?
- «G.O.R.A». Osy fılmnen keıin kıno ónerine birjola bet burdym. Tipti, kıno salasyndaǵy izasharym boldy desem, qatelespeımin.
- Arash-tyń «Donya» ániniń klıpine qalaı tústiń?
- Ol klıpte japon mafııasyn oınadym ǵoı. Túsilim jumystary Túrkııada júrgizildi. Buryn birge jumys istegen top túsirgen edi. Kórermen aldynda qalyptasqan qıyq kóz tıpajymdy laıyq kórse kerek, jigitter meni sol ysqaıaq qýdyń obrazynda oınaýǵa shaqyrdy.
- Qazaqstanǵa jıi kelip turasyń ba?
- Kıno salasynda Qazaqstanda da dostarym bar. Jıi bolmaǵanmen, ara-tura at izin salyp turamyn. Astana unaıdy, óte ádemi qala. Túrkııada qolymnan kelgenshe Qazaqstandy jáne qazaqtardy jarnamalap júrmin dep oılaımyn.
- Jaqynda eńbekteriń úshin Túrkııanyń bir ýnıversıtetinde arnaýly syılyq alypsyń. Sol týraly aıta ketseń?
- Kyrshehır qalasyndaǵy Ahı Evran ýnıversıtetinde Túrki álemi qaýymdastyǵynyń «Túrki álemine qyzmet» syılyǵyn Qazaqstannyń Túrkııadaǵy elshisi Janseıit Túımebaev tabys etti.
- Suhbatyńa rahmet, oılaǵanyń oryndala bersin!
Suhbattasqan: Arshat ORAZOV
