«Jatjurttan jumys kúshin shaqyratyn boldyq pa?» - respýblıkalyq basylymdarǵa sholý
ASTANA. Aqpannyń 10-y. /QazAqparat/ - Qazaq aqparat agenttigi respýblıkalyq basylymdarda aqpannyń 10-y, sársenbi kúni shyqqan ózekti materıaldarǵa sholýdy usynady.
Ótken senbide Elbasy Nursultan Nazarbaev astanalyq kórermendermen birge "Siz kimsiz, Ka myrza?" fılmin tamashalady. Prezıdent kınotýyndyǵa rızashylyǵyn bildirdi. Atalǵan taqyrypty arqaý etken maqala «Egemen Qazaqstan» basylymynyń búgingi sanynda «Jarasymdy dástúr jalǵastyǵy» degen taqyryppen berilipti. Maqalada Nursultan Ábishuly kıno óneriniń tarlany Asanáli Áshimovke qarata:"Men buryn da birneshe ret aıtqanmyn, búgin de qaıtalaımyn. Jer betindegi ár qazaqtyń bir-aq Otany bar. Ol - Qazaqstan. Sol Otanǵa qyzmet etý - árbir qazaqtyń abzal boryshy bolmaq. Sizdiń fılm jastardy otanshyldyqqa tárbıeleıtin fılm bolyp shyǵypty. Nashaqorlyq, narkobıznes - álemdi alańdatyp otyrǵan problema. Qazaqstannyń qaýipsizdik organdary bul dertpen bitispes kúres júrgizýde. Osy másele de fılmde táp-táýir kórinis taýypty. Biz jastardy osy keselmen kúresýge úndeýimiz kerek. Fılmde bandıt ataýlynyń barar jeri ajal ekeni anyq kórsetilgen. Sondyqtan jańa týyndynyń sátti shyǵýymen quttyqtaımyn" degen sózinen úzindi keltiripti.
«Qazaqstanda jyl saıyn týabitti júrek aqaýymen 3 myńǵa jýyq sábı dúnıege kelse, olardyń 10-15 paıyzy ǵana bir jasqa deıin ómir súredi. Búginde 5 myńǵa taıaý sábı týabitti júrek aqaýyn emdeý operatsııasyn jasatýǵa kezekte tur. Búkil órkenıetti elderde týabitti júrek aqaýy - balalardyń ómirine shyǵarylǵan úkim emes»,- dep jazǵan «Egemen Qazaqstan» gazetindegi kelesi maqala «Qazaqstandyq sábıler emi bar aýrýlardan shetinemeýi kerek!..» degen taqyryppen jaryq kóripti. Maqalada elimizdegi qaıyrymdylyq qorlary men uıymdardyń basty maqsaty - osy máselege qoǵamnyń, eń bastysy - memlekettiń nazaryn aýdarý ekendigi aıtylady.
***
«Jatjurttan jumys kúshin shaqyratyn boldyq pa?». Osyndaı taqyryppen «Aıqyn» basylymynyń búgingi sanynda jaryq kórgen maqala qazaq eliniń ındýstrııalyq órleýine halqymyzdyń azdyǵy qolbaılaý bolatyndyǵyn aıtady. «Ókiletti organdar usynǵan elimizdegi jumys kúshiniń áleýeti jónindegi taldaýlarǵa úńilgen birinshi vıtse-premer Ómirzaq Shókeev Mınıstrler kabınetiniń keshegi otyrysynda jatjurttardan jumys qolyn shaqyrýǵa arnalǵan shekti keńeıtý usynysyn alyp shyǵýǵa májbúr boldy»,- deıdi basylym.
«Aıqyn» gazetinde jaryq kórgen kelesi maqala «Jeti myńnan astam adam KSRO pasportymen júr» degen taqyryppen berilipti. Aty aıtyp turǵandaı, maqalada Keńes ókimeti kezindegi qyzyl tólqujatty kúni búginge deıin ustap júrgender bar ekendigin, tek byltyrǵy jyly Ádilet mınıstrliginiń organdaryna tólqujatyn aýystyrýǵa nıet bildirgenderdiń sany jeti myńnan asqandyǵy jazylypty.
Atalǵan basylymnyń dástúrli «Aq sóıle» aıdarynda «Alash ıdeıasy eshqashan óshpek emes...» degen taqyryppen jazýshy, ǵalym Tursyn Jurtbaımen bolǵan suhbat jarııalanypty. Suhbatta jazýshy «Alashorda» qaıratkerleri týraly sóz qozǵaıdy.
***
«Ádettegi ýaqytynan 7 mınýtqa keshigip bastalǵan Úkimettiń keshegi otyrysy tup-týra 74 mınýtqa sozyldy. Osy aralyqta mańyzdy degen tórt másele qaralyp, alty baıandamashy ortaǵa shyqty. Tek otyrys aıaqtalýǵa az qalǵanda kútpegen jerden Densaýlyq mınıstri Jaqsylyq Dosqalıev «taıaq jep qala» jazdady»,- dep jazady «Alash aınasy» basylymynyń búgingi sany. Egjeı-tegjeıin gazettegi «Ákimniń «soqqysy» mınıstrge darymady» degen taqyryppen berilgenmaqaladan oqı alasyzdar.
Búginde Qazaqstanda 63 838 adam temir tordyń arǵy jaǵynda otyr. Ótken jylmen salystyrǵanda qamaýdaǵy adam sanynyń birshama artqany baıqalady. Taǵy bir derek, árbir 100 myń adamǵa shaqqanda abaqtyda otyrǵan adam sany boıynsha Ortalyq Azııa elderi arasynda Qazaqstan kósh bastap keledi eken. Sondaı-aq túrmedegiler qatary shetelden qonys aýdarǵan azamattardyń esebinen de tolyǵýda. Bul jerde «Ózge eldiń buryn qylmys jasaǵan turǵyndaryna Qazaqstan azamattyǵyn berýge tyıym salý kerek pe?» degen saýal týady. Buǵan tanymal adamdarymyz ne deıdi? «Alash aınasy» gazetinniń «Oı-kókpar» aıdarynda QR Parlament Májilisiniń depýtaty Amangeldi Momyshev pen eks-depýtaty Serik Ábdirahmanov atalǵan taqyryp tóńireginde pikir talastyrypty.
«Alash aınasy» basylymynyń turaqty «DAT» aıdarynda búgingi kúnniń ózekti máseleleriniń biri jer problemasy jaıynda áńgime qozǵalyp, Jer resýrstaryn basqarý agenttiginiń tóraǵasyÓmirzaq Ózibekov biraz jaıttyń betin ashypty. «Tipti keıingi jyldary, aýyl-aımaqtarda jerdi satyp aldym degen syltaýmen, aǵaıynnyń malyn órisinen aıyryp, qorshaýdan assań, qýyp-qorqytatyn jaǵdaılar da qylań berýde»,- deıdi Ómirzaq Ózibekov gazettegi suhbatynda. Tolyǵyraq «Eger jer paıdaǵa jaratylmasa, ony sot arqyly memleket enshisine qaıtarý kerek» degen taqyryppen berilgen suhbatqa nazar aýdaryńyz.
Aldyndaǵy asynyń adal bolýyn qalaıtyn aǵaıynǵa jaǵymdy jańalyq: Budan bylaı haram menen halaldy aıyrýǵa «dońyz testi» kómektesetin boldy. Qarapaıym túrde osylaı ataǵan durys shyǵar. Sebebi bul shaǵyn aspap aldyńda turǵan ishpek-jemek óniminiń quramynda dońyzǵa qatysty ne bar ekenin birden anyqtap beredi. Ǵylymı jańalyqty jasaǵandar da otandyq ǵalymdar, basynda júrgen jigitter ózimizdiń qarakózder eken. Atalǵan basylymnyń búgingi sanyndaǵy «Asyńnyń adaldyǵyn «dońyz testi» tekseredi» degen maqalany oqýǵa asyǵyńyz.
