Jatyrdan tys uryqtandyrý tsıkldaryn tegin júrgizýge jylyna 750 mln.-ǵa jýyq teńge bólý kózdelip otyr - vıtse-mınıstr
TANA. 28 qazan. QazAqparat /Gúlmıra Alıakparova/ - 2015 jylǵa qaraı Qazaqstanda jatyrdan tys uryqtandyrý protsedýralaryn tegin júrgizýge jylyna 747 mln. teńge bólinetin bolady.
Bul týraly búgin Astanada bastalǵan «Bedeýlikti emdeýdiń qazirgi sheshimderi. Qosalqy reprodýktıvti tehnologııalardyń (QRT) problemalary» atty ІІІ halyqaralyq ǵylymı-tájirıbelik konferentsııada QR Densaýlyq saqtaý vıtse-mınıstri Erik Baıjúnisov málim etti.
Vıtse-mınıstr atap kórsetkendeı, Qazaqstanda demografııalyq ósiminiń oń úderisine qaramastan, bedeýlik problemasyna basa nazar aýdarylyp otyr. Statıstıkalyq derekterge súıensek, álemde nekelerdiń 15 paıyzǵa jýyǵy bedeýlik problemasyn bastap ótkerýde. Al 6 mln.-nan astam halqy bar Qazaqstan Respýblıkasynda bul taýqymetpen kezdesip otyrǵan 150 myńǵa jýyq erli-zaıypty bar. Olardyń 6,5 myńǵa jýyǵy jatyrdan tys uryqtandyrýdy (EKO) qajet etetinder.
Búginde Qazaqstanda QRT-ny júzege asyratyn 10 ortalyq jumys isteıdi. Onyń úsheýi - memlekettik. QR Densaýlyq saqtaý mınıstrligi ókilderiniń sózine qaraǵanda, ortalyqtardyń sany EKO-ǵa zárý 6,5 myń erli-zaıyptyny qamtýǵa tolyq jetkilikti. Problema tek qarjylandyrý máselesinde. Sebebi, bir naýqasqa jasalatyn EKO-nyń bir áreketine 600-700 myń teńge qarjy jumsalady. Atalmysh ortalyqtarda osy jyldar ishinde QRT baǵdarlamasy boıynsha 20 myńǵa jýyq erli-zaıypty emdeýden ótti. Nátıjesinde, kópten kútken 6 myńǵa jýyq sábı dúnıege keldi.
Qazaqstanda qosalqy reprodýktıvti tehnologııalar 1995 jyldan bastap paıdalanylyp keledi. Elde embrıondardy krıokonservatsııalaý (paıdalanylmaǵan uryqty bolashaqqa muzdatyp qoıý), jynystyq kletkalardyń donorlyǵy jáne sýrogattyq ana baǵdarlamalary iske asyrylýda.
2010 jyly memleketpen kepildendirilgen tegin medıtsınalyq kómek kóleminiń tizimine QRT boıynsha qyzmetter - jatyrdan tys uryqtandyrý (EKO) jáne embrıondardy tasymaldaý engizildi. 2010 jyly memlekettiń qarjysy esebinen jatyrdan tys uryqtandyrý áreketteri 100 áıelge jasaldy, nátıjesinde 22 náreste dúnıege esigin ashty. Al 2015 jylǵa qaraı «Salamatty Qazaqstan» ulttyq baǵdarlamasy sheńberinde EKO-nyń kólemi jylyna 750-ge deıin arttyrylatyn bolady.
«2011 jyly memlekettik tapsyrys 2 memlekettik jáne 3 jekemenshik medıtsınalyq mekemede ornalastyryldy. Bizdiń búgingi kúngi maqsatymyz, 2015 jylǵa qaraı bir jylda 750 tsıkl jasaý jáne qarjylandyrýdy 747 mln.-teńgege jetkizý bolyp tabylady», - dedi E.Baıjúnisov.
