Jatyr moıny qaterli isigine qarsy vaktsına elimizge 2021 jyly keledi
NUR-SULTAN. QazAqparat – Dúnıejúzilik densaýlyq saqtaý uıymy 2021 jyldy jatyr moıny qaterli isigimen kúres jyly dep jarııalady. Bul týraly QR Densaýlyq saqtaý mınıstrliginiń bas onkolog dárigeri, Qazaq ulttyq onkologııa jáne radıologııa ınstıtýtynyń dırektory Dılıara Qaıdarova Instagram paraqshasynda ótken tikeleı efırde aıtty, dep habarlaıdy QazAqparat tilshisi.
«18 qańtardan bastap jatyr moıny qaterli isigi týraly dúnıejúzilik aptalyq bastaldy. 30-70 jas aralyǵyndaǵy árbir áıel jatyr moıny qaterli isiginiń profılaktıkasy úshin onkogınekologqa qaralýy kerek. Qazaqstanda bul skrınıng tegin jasalady. Negizi jylyna bir ret barlyq skrınıngten ótip turǵan durys. Skrınıng jasatqan kezde jatyr moıny erozııasy, dısplazııa sııaqty aýrý túrleri anyqtalýy múmkin. Munyń bári qaterli isikke deıin bolatyn jaǵdaı», - deıdi bas onkolog dáriger Dılıara Qaıdarova.
Sondaı-aq, ol Dúnıejúzilik densaýlyq saqtaý uıymy 2021 jyldy jatyr moıny qaterli isigimen kúres jyly dep jarııalaǵanyn aıtty.
«Jatyr moıny qaterli isigimen kúresý skrınıngten ótýmen ǵana shektelmeıdi, bul dertke qatysty vaktsına egý keerk. Biz vaktsına jetkizýshilermen sóılestik. Ókinishke qaraı, vaktsına alýǵa kezekte turǵan memleketter kóp. Qazaqstan da kezekte turǵandar qatarynda. Vaktsına elimizge 2021 jyly kelýi múmkin. ázirge vaktsına bolmaǵandyqtan, turaqty túrde gınekologqa baryp qaralyp turý kerek», - deıdi ol.
