Jattyqtyrýshyny soqqyǵa jyqqan: Túrkistandaǵy janjaldan keıin eki bapker ýaqytsha qyzmetinen shettetildi
TÚRKІSTAN. KAZINFORM – Túrkistanda jattyqtyrýshyǵa soqqy jasalǵan sát beınelengen vıdeo áleýmettik jelilerde tarady.
Túrkistan oblystyq sý sport túrlerinen olımpıada rezerviniń mamandandyrylǵan balalar-jasóspirimder sport mektebiniń jattyqtyrýshysy ári Qazaqstan chempıonatynyń júldegeri Tımýr Alıhanov baıdarka men kanoede esý sport túrinen memlekettik jattyqtyrýshy Dáýlet Sultanbekov tarapynan ózine kúsh qoldanylǵanyn aıtyp, polıtsııaǵa aryzdanǵanyn málimdedi.
Onyń aıtýynsha, oqıǵa 7 maýsym kúni Túrkistan qalasyndaǵy eskek esý arnasynda ótken baıdarka men kanoede esýden Azııa chempıonaty kezinde bolǵan.
Tımýr Alıhanovtyń sózinshe, janjal barysynda Dáýlet Sultanbekov oǵan kúsh qoldanyp, jaq tusynan eki ret soqqy jasaǵan. Sondaı-aq ol kópshilik aldynda qorlanyp, qyzmetinen bosatý týraly qoqan-loqy jasalǵanyn alǵa tartty.
– Janjal kezinde Dáýlet Sultanbekov maǵan eki ret soqqy jasap, dene jaraqatyn keltirdi. Buǵan qosa kópshilik aldynda balaǵattap, qorlap, jumystan shyǵaramyn dep qorqytty, – dep jazdy T.Alıhanov áleýmettik jelidegi paraqshasynda.
Oqıǵadan keıin ol Túrkistan qalalyq polıtsııa basqarmasyna aryz túsirgen. Alaıda osydan keıin ózine qysym kórsetile bastaǵan.
Bapkerdiń sózinshe, aryzdy qaıtaryp alýdy tek Dáýlet Sultanbekov qana emes, oblystyq sport mektebiniń dırektory Nurlan Aıtbekov te talap etken.
Sonymen qatar ol qarsy taraptan ózine qatysty da aryz túskenin jáne qysym kórsetý faktileri áli de jalǵasyp jatqanyn málimdedi. Bapker quzyrly organdardan iske obektıvti baǵa berip, jan-jaqty tergeý júrgizýdi surady.
Oqıǵaǵa qatysty Túrkistan oblysynyń dene shynyqtyrý jáne sport basqarmasy resmı málimdeme jasady.
Basqarmanyń habarlaýynsha, janjalǵa qatysqan eki tarap – baıdarka men kanoede esý sport túrinen memlekettik jattyqtyrýshy Dáýlet Sultanbekov pen jattyqtyrýshy Tımýr Alıhanov tergeý amaldary tolyq aıaqtalǵanǵa deıin qyzmettik mindetterin atqarýdan ýaqytsha shettetilgen.
Aldyn ala málimetke sáıkes, atalǵan azamattar arasynda ózara túsinispeýshilik saldarynan janjal týyndaǵan.
– Qazirgi ýaqytta oqıǵa boıynsha quzyrly organdar sotqa deıingi tergep-tekserý jumystaryn júrgizip jatyr. Oqıǵanyń barlyq mán-jaıy jan-jaqty zerdelenip, qatysýshylardyń áreketine quqyqtyq baǵa beriledi, – delingen basqarma málimdemesinde.
Buǵan deıin Túrkistanda basqarma basshysy qatysqan tóbelestiń vıdeosy taraǵanyn jazǵan edik.
