Petropavlda órtengen turǵyn úıden úsh adamnyń denesi tabyldy

PETROPAVL. KAZINFORM – Petropavlda jeke turǵyn úı sektorynda órt shyǵyp, oqıǵa ornynan úsh adamnyń, sonyń ishinde úsh jasar qyzdyń máıiti tabyldy.

Soltústik Qazaqstan oblysy tótenshe jaǵdaılar departamenti baspasóz qyzmetiniń málimetinshe, órt Jumysshy kentinde 6 qazan kúni tańǵy saǵat 3:00 shamasynda shyqqan. Órt sóndirý bólimsheleri kelgen kezde jeke turǵyn úıdiń aýmaǵyndaǵy eki turǵyn úı jáne bir sharýashylyq nysany otqa oranyp, lapyldap janyp jatqan. Bul úılerde 4 adam turǵan eken.

Órtti sóndirý barysynda 2021 jyly týǵan qyz balanyń, 1979 jyly týǵan er adamnyń jáne 1985 jyly týǵan áıeldiń deneleri tabyldy.

Órtti sóndirýge órt sóndirý qyzmetinen 20 adam jáne 6 tehnıka qatysty. Órt saǵat 5.00 shamasynda tolyǵymen sóndirildi. Órt shyqqan jerdiń jalpy aýmaǵy 84 sharshy metr. Eki turǵyn úı jáne bir sharýashylyq nysany tolyq janyp ketti. Qazir órttiń shyǵý sebebi men keltirilgen zalal kólemi anyqtalyp jatyr.

Buǵan deıin SQO-da bıyl zorlyq-zombylyqqa qatysty 12 bala otbasynan alynǵanyn jazǵan edik.