Jattyǵýdaǵy jańa taktıka nátıjesin berdi — Nazarbaı Sattarhan

Sportshy Kazinform tilshisine Azııa oıyndaryna daıyndyq barysy jáne basty qarsylastar týraly pikir bildirdi.

— Biz jerebeden barlyǵy ońaı bolmaıtynyn túsindik, sebebi Qytaı quramasymen bir setkaǵa tústik. Alǵashqy jekpe-jek Saýd Arabııasymen boldy. Birinshi aıqas ár qashan qyıyndaý bolady. Sebebi, atmosferany seziný, ortaǵa boı uıretý kerek. Osydan keıin Qytaı quramasymen kezdestik. Sol sebepti jarys óte shılenisti ótti. Biz óte jaqsy formada kelip, komandalyq rýhtyń arqasynda myqty qarsylasty baǵyndyrdyq. Jarys qojaıyndary japondyq sportshylarǵa basynda esepti kóp aldyǵa jiberip aldyq. Bapker derkezinde taktıkalyq ózgeris jasap, biz esepti qýyp jetýge tyrystyq. Biraq, kelesi joly Japon quramasyn jeńemiz dep oılaımyn. Sebebi, olarmen qalaı aıqasý kerek ekenin túsindik, — dedi ol.

Qazaqstandyq semserlesýshi komandanyń daıyndyq deńgeıi týraly aıtty.

— Qurama komanda Parıj qalasynda jańa frantsýz bapkermen daıyndalyp jatyr. Sol sebepti jańa taktıka, jańa stıl qoldanyp jatyrmyz, jáne ol óz nátıjesin kórsetip jatyr. Osyǵan deıin Qytaı quramasyna kóp jol beretin edik, búgin biz olardy qapy qaldyrdyq. Aldaǵy ýaqytta jalǵasty keshendi jumystar atqaramyz, — dedi ol.

Nazarbaı Sattarhan Qazaqstan quramasynyń shpaga boıynsha Álem chempıony ekenin eske salyp, elimizdegi semserlesý sportynyń damýyn tilge tıek etti.

— Qazaqstanda bul sporttyk damý óte qarqyndy. Osydan bes-alty jylmen salystyrǵanda obylystarda jáne ulken qalalarda kóp uıirmeler ashylyp, jastar men balalar kóptep qatysyp jatyr. Bir Almaty qalasynyń ózinde alty-jeti semserlesý zaly bar. Sol sebepti, elimizde bul sporttyń damý bolashaǵy zor, — dedi sportshy.

Osyǵan deıin habarlaǵanymyzdaı, semserlesýden Qazaqstan erler quramasy Azııa oıyndarynda sablıa baǵdarlamasy boıynsha qola júlde enshiledi.

Sonymen qatar, Artem Sarkısıan sablıadan jekeleı synda qola medal qanjyǵalady.