«Jattandy» oqýdy qoıý qajet - B. Jumaǵulov
ASTANA. 24 tamyz. QazAqparat - Bıyl UBT nátıjeleri ótken jylmen salystyrǵanda áldeqaı da tómen boldy.
Bul týraly búgin Astanada «Bilim berý júıesin jańǵyrtý - adamı kapıtaldyń sapaly ósýiniń basty baǵyty» respýblıkalyq pedagogıkalyq tamyz konferentsııasynyń plenarlyq otyrysy barysynda Bilim jáne ǵylym mınıstri Baqytjan Jumaǵulov málim etti.
«Qatysýshylardyń 36 paıyzy «shekti» deńgeıden óte almady, al byltyr tek 10 paıyz bolatyn. Bunyń sebebi nede? Birinshiden, UBT-ny uıymdastyrý men ótkizýge talap kúsheıtildi. Bul testileýdiń barynsha ádil ótýin qamtamasyz etti»,-dedi mınıstr.
Onyń sózine qaraǵanda, ekinshiden, test mazmuny jańartyldy. Oǵan «oqyp, bilý», «jattaý», deńgeıindegi tapsyrmalar ǵana emes, oılap, sheshýdi qajet etetin logıkalyq tapsyrmalar engizildi. Logıkalyq tapsyrmalar kóbirek qıynǵa tústi. «Mysaly, matematıka boıynsha bitirýshilerdiń 63 paıyzy jaýap bere almaǵan. Osyldardyń bári mekteptegi bilim berý sapasynyń jetkilikti deńgeıde emes ekendigin kórsetti. Sondyqtan, munyń túpki sebepterin anyqtap, naqty sharalar qabyldaý kerek»,-dedi B. Jumaǵulov.
Mınıstrdiń paıymdaýynsha, birinshiden, «jattandy» oqýdy qoıý qajet. Jattandy oqýdyń ornyna pánderdi júıelep oqytýǵa kóshken jón. «Buǵan jol berýge bolmaıdy. Óıtkeni, ol memlekettik bilim berý standartyna jáne oqytý sapasyna keri áser etedi. Osy oraıda aldaǵy ýaqytta jańa testilerde mundaı tapsyrmadar bolmaýy tıis»,-dep atap ótti vedomstvo basshysy.
