Jatyr moıny obyrynan qalaı saqtanýǵa bolady

ASTANA. KAZINFORM – Jatyr moıny obyrynan saqtanýdyń eń tıimdi joly – adam papılloma vırýsyna (APV) qarsy vaktsınatsııa. Astana qalasynyń akýsher-gınekology, professor Janerke Ajetova vaktsınatsııanyń mańyzdylyǵyna toqtaldy.

Vaktsına jasóspirim qyzdarǵa, ıaǵnı 11–12 jas aralyǵynda salynady. Ol obyrǵa deıingi jaǵdaılardyń aldyn alyp, qaterli isik qaýpin azaıtady. Tipti bolashaqta vırýs juqtyrǵan adammen baılanys bolsa da, vaktsına alǵan qyz nemese áıel aýrýǵa shaldyǵý qaýpi tómendeıdi.

Dúnıejúzilik densaýlyq saqtaý uıymynyń usynymyna sáıkes, 15 jasqa deıingi qyzdardyń keminde 90 paıyzy vaktsınalanýy tıis. Qazaqstanda bul ekpe ulttyq kúntizbege engizilip, barlyq mektepte tegin júrgiziledi. Qoldanylatyn Gardasil vaktsınasy joǵary onkogendi 16 jáne 18 tıpterge, sondaı-aq 6 jáne 11 tıpterge qarsy qorǵanys beredi.

– Vaktsınatsııa – strategııalyq mańyzdy qadam. Ol áıelder arasyndaǵy onkologııalyq ólim-jitimdi azaıtyp, keleshekte deni saý urpaq qalyptastyrýǵa múmkindik beredi, - dedi Astana qalasynyń Kommýnıkatsııalar qyzmetinde ótken brıfıngide akýsher-gınekolog Janerke Ajetova.

Maman ata-analardy qyz balalaryn der kezinde vaktsınatsııalaýǵa jaýapkershilikpen qaraýǵa shaqyrdy.

Aıta keteıik, buǵan deıin vaktsınatsııalaý boıynsha eseptilik elektrondyq formatqa kóshiriletini týraly jazǵan edik.