Jataqhananyń ár bólmesinde jýynatyn oryn men dárethana bolýy shart - qurylys komıteti
ASTANA. QazAqparat - Depýtat Azat Perýashevtyń usynysy boıynsha dárethanasyz jataqhanalardy salý úshin qazirgi tıptik jobalardy ózgertý kerek.
Alaıda QR Investıtsııalar jáne damý mınıstrliginde ondaı jospar joq, dep habarlaıdy QazAqparat tilshisi.
«Osydan eki-úsh jyl buryn biz jataqhanalardyń tıptik jobalaryn ázirlegen bolatynbyz. Ondaı baspananyń quny arzan bolmaıdy. Sebebi árbir bólmede dárethana men jýynatyn oryn qarastyrylǵan. Onsyz bolmaıdy. Sondyqtan qazirgi jobalardy ózgertken orynsyz dep oılaımyn. Árıne, jataqhanalardy salý qajet. Sebebi halyqty baspanamen qamtamasyz etý kerek. Degenmen, ondaı jataqhanalarda barlyq jaǵdaılar bolýy shart», - dedi qurylys jáne turǵyn úı - kommýnaldyq sharýshylyq isteri komıtetiniń tóraǵasy Marhabat Jaıymbetov búgin Astanada ótken baspasóz máslıhatynda.
Onyń aıtýynsha, búginde jataqhana men turǵyn úıdiń baǵasy arasynda kóp aıyrmashylyq joq. Degenmen, jataqhana bólmesi páterden shaǵyn bolǵannan keıin halyq tarapynan ondaı qurylysqa degen suranys joǵary bolady. «Bizde jataqhana salý jospary joq. Alaıda jergilikti atqarýshy organdar, ıaǵnı ákimdikter ondaı qurylysty qolǵa ala alady. Sosyn joǵary oqý oryndary da qazirgi tıptik joba boıynsha jataqhana salamyz dep jatyr», - dep atap kórsetti Jaıymbetov.
Aıta keteıik, Azat Perýashev Májilistiń jalpy otyrysynda «Nurly jer» baǵdarlamasy boıynsha dárethanasyz jáne asúısiz páter salýdy usynǵan bolatyn. Sol arqyly bólmeler aýmaǵy únemdelip, arzan baspanamen qamtý jumysy jandanady dep esepteıdi halyq qalaýlysy. 2017 jyldyń 1 qańtaryndaǵy jaǵdaı boıynsha, elimizde 428 350 azamat páter kezeginde tur.
