Jataqhanalardyń qurylysy: Oqytýshylar jalaqysy men oqý baǵasy ózgere me
ASTANA. QazAqparat - QR Bilim jáne ǵylym mınıstrligi jataqhanalar qurylysyn qarjylandyrý tetikterin ázirledi. Oǵan sáıkes, joǵary oqý orny nemese qurylys kompanııasy jataqhanany ózi salady. Atalǵan nysan paıdalanýǵa berilgennen keıin memlekettiń sýbsıdııasy tólenedi, dep habarlaıdy QazAqparat tilshisi.
QR Bilim jáne ǵylym vıtse-mınıstri Bıbigúl Asylovanyń aıtýynsha, jataqhanalar qurylysyn qarjylandyrýdyń qazirgi júıesi oqytýshylardyń jalaqysyna da, oqýdyń baǵasyna da keri áserin tıgizbeıdi.
«Negizi, qurylystyń shyǵyndary - ol múldem bólek aqsha. Onyń jalaqyǵa eshbir qatysy joq. Máselen, memlekettik bilim berý granty bólingende professor-oqytýshylardyń jalaqysy jáne oqý protsesine qatysty barlyq shyǵyndar eskeriledi. Al jataqhanalardyń qurylysy bólek óteledi. Oǵan bıýdjetten arnaıy qarjy bólinedi», - dedi B.Asylova QazAqparat tilshisine bergen suhbatynda.
Onyń aıtýynsha, joǵary oqý orny, ıa bolmasa, qurylys kompanııasy aldymen jataqhananyń jobasyn ázirleıdi. Osydan keıin «Qarjy ortalyǵy» AQ-men ekijaqty kelisimshart rásimdeledi. Sonyń negizinde ekinshi deńgeıli bankten nesıe alyp, qurylys jumystaryn bastaýǵa bolady.
«Nysandy paıdalanýǵa bergennen keıin biz árbir jatyn orynǵa belgili bir ýaqyt boıy sýbsıdııa tóleıtin bolamyz. Osylaısha, jataqhananyń qurylysyna ketken shyǵyndar óteledi», - dep atap kórsetti B.Asylova.
Aıta keteıik, buǵan deıin QR Bilim jáne ǵylym mınıstri Erlan Saǵadıev stýdentterge qosymsha bólinetin 20 myń grant pen jataqhanadaǵy 75 myń orynnyń qarjylandyrý tetikteri jaıynda aıtqan bolatyn. Al QR Din isteri jáne azamattyq qoǵam vıtse-mınıstri Abzal Núkenovtyń oıynsha, jataqhanalar qurylysyna stýdentterdi de tartýǵa bolady. Memleket basshysy Nursultan Nazarbaevtyń tapsyrmasyna sáıkes, 2022 jyldyń sońyna deıin respýblıka boıynsha 75 myń oryndyq jataqhanalar paıdalanýǵa berilýi tıis.
