Jataqhanadan oryn almaǵan almatylyq stýdentter qaıda júgine alady
ASTANA. KAZINFORM — Almatyda stýdentterge ýaqytsha baspana beretin daǵdarys ortalyǵy bar, dep habarlaıdy Ǵylym jáne joǵary bilim mınıstrliginiń baspasóz qyzmeti.
QR Ǵylym jáne joǵary bilim mınıstrliginiń jáne Almaty qalasy ákimdiginiń qoldaýymen M.Tynyshbaev atyndaǵy ALT University bazasynda stýdentterge arnalǵan daǵdarys ortalyǵy tórtinshi jyl qatarynan jumys istep keledi. 2026 jyly ortalyq Almaty qalasyndaǵy bilim alýshylardy qoldaý júıesi aıasynda óz jumysyn jalǵastyrady.
Daǵdarys ortalyǵy ALT University №1 Stýdentter úıinde, Almaty qalasy, Máýlenov kóshesi, 108 mekenjaıynda ornalasqan. Ortalyq 50 orynǵa eseptelgen.
Ortalyq ýaqytsha turýdy jáne qosymsha áleýmettik, psıhologııalyq nemese konsýltatsııalyq qoldaýdy qajet etetin stýdentterge arnalǵan. Kómekke Almaty qalasyndaǵy kez kelgen joǵary oqý ornynyń stýdentteri júgine alady.
Ýaqytsha ornalastyrýdy qajet etetin stýdentter kórsetilgen baılanys telefondary arqyly Ahýaldyq ortalyqqa habarlasa alady. Mamandar árbir ótinishti jeke qarastyryp, stýdentti ózi bilim alatyn joǵary oqý ornynyń jataqhanasyna ornalastyrý múmkindigin anyqtaıdy.
— Eger joǵary oqý orny stýdentke jataqhanadan oryn usyna almasa, bos oryn bolǵan jaǵdaıda stýdent ýaqytsha turý úshin ALT University bazasyndaǵy daǵdarys ortalyǵyna ornalastyrylýy múmkin. Ornalastyrý ótinish qaralyp, jaýapty mamandarmen kelisilgennen keıin júzege asyrylady. Bul tásil stýdentti turaqty turatyn orny anyqtalǵanǵa deıin ýaqytsha baspanamen qamtamasyz etýge jáne onyń oqý protsesiniń úzdiksizdigin saqtaýǵa múmkindik beredi, — delingen habarlamada.
Daǵdarys ortalyǵynda stýdentterdiń jaıly turýyna, oqýyna jáne kúndelikti turmysyna qajetti jaǵdaılar jasalǵan. Ortalyqta oqý jáne turmystyq aımaqtary bar turǵyn bólmeler, as úı modýlderi jáne qajetti jıhazdar qarastyrylǵan. Sonymen qatar sanıtarııalyq-gıgıenalyq bólmeler, sport zaly jáne alǵashqy medıtsınalyq kómek kórsetýge arnalǵan medıtsınalyq pýnkt jumys isteıdi.
Stýdentter ortalyqta bolǵan kezeńde psıhologııalyq, áleýmettik jáne konsýltatsııalyq qoldaý ala alady. Barlyq ótinishter qupııalylyq qaǵıdattary men jeke tásil negizinde qarastyrylady. Baılanys telefondary: +7 700 950 95 28, +7 727 237 01 70.
Buǵan deıin stýdentterdiń 85 paıyzy jataqhanamen qamtylǵanyn jazǵanbyz.
