Jataqhanadaǵy órt: Astanalyq boıjetken úshinshi qabattan sekirgen
ASTANA. QazAqparat - 13 naýryz kúni Astananyń Ońtústik-shyǵys shaǵyn aýdanynda bolǵan órttiń mán-jaıy belgili boldy, dep habarlaıdy QazAqparat.
Atap aıtqanda, 13 naýryzda №1 qalalyq aýrýhanaǵa órtten zardap shekken Vıktorııa Shvetsova jetkizildi. 24 jastaǵy qyz tilsiz jaý ǵımaratty sharpyǵan kezde kottedjdiń joǵary qabatynda bolǵan. Ottan qorǵaný úshin ol úıdiń terezesinen sekirýge májbúr boldy. Sonyń saldarynan qyzdyń omyrtqasy zaqymdanyp, aıaǵy syndy. Sonymen qatar onyń denesin kúıik shalǵan.
«Bul, negizi jataqhana. Osy nysannyń birinshi qabatynda tehnıkalyq qyzmet kórsetý stansasy bar. Órt bolǵan kezde joǵary qabatta edim. Tútinniń saldarynan syrtqa shyǵý múmkin bolmady. Sasqanymnan dosyma telefon shaldym, ol terezeden sekir dedi», - dep aıtyp berdi Vıktorııa.
Onyń sózine qaraǵanda, jataqhanadan sekirgen kezde, tómengi qabattardyń terezesinen shyqqan jalynǵa denesin kúıdirip alǵan.
Atalǵan aýrýhananyń dárigeri Rýslan Botabaevtyń aıtýynsha, Vıktorııa aýrýhanaǵa jetkizilgen sátte onyń jaǵdaıy aýyr bolǵan. «Shuǵyl tártipte ony operatsııa bólimine apardyq. Barlyq qajetti operatsııalar jasaldy. Qazirgi kezde naýqastyń densaýlyq jaǵdaıy turaqty», - dedi dáriger.
Ońtústik-Shyǵys aýdanyndaǵy Syrymbet, 30 mekenjaıynda TQS órtengeni týraly buǵan deıin habarlaǵan bolatynbyz. Kottedjdiń birinshi qabaty TQS bolsa, ekinshi qabatta sharýashylyq bólmeleri ornalasqan. Al úshinshi qabat turǵyn úı retinde jabdyqtalǵan. Tilsiz jaýdyń jalyny jaqyn mańdaǵy ǵımaratty da sharpydy. Órt 500 sharshy metrge jýyq aýmaqty sharpydy. Oqıǵa saldarynan ana men bala qaza boldy.
Foto: socalpersonalinjurylawyer.com
