Jataqhanadaǵy oryn bólý: kimderge basymdyq beriledi
ASTANA. KAZINFORM – Jataqhanaǵa ornalasý tártibi, stýdentterge kórsetiletin qoldaý sharalary jáne qandaı da bir másele týyndaǵan jaǵdaıda qaıda júginýge bolady? Osy jáne ózge de mańyzdy suraqtarǵa QR Ǵylym jáne joǵary bilim mınıstrliginiń Joǵary jáne joǵary oqý ornynan keıingi bilim komıteti tóraǵasynyń orynbasary Aqerke Abylaıhan jaýap beredi.
Búginde elimizde stýdentterdi jataqhanamen qamtamasyz etý, oryn tapshylyǵyn azaıtý jáne bilim alýshylarǵa qolaıly jaǵdaı jasaý baǵytynda júıeli jumystar júrgizilip jatyr. Memleket basshysynyń strategııalyq tapsyrmalary aıasynda elimizde 72 125 oryndyq 281 jataqhana paıdalanýǵa berildi. Onyń ishinde JOO stýdentteri úshin 51 323 oryndyq 182 jataqhana.
Jataqhanadaǵy oryndar, eń aldymen, áleýmettik osal sanattaǵy bilim alýshylarǵa basymdyqpen beriledi. Atap aıtqanda:
— ata-anasynyń qamqorlyǵynsyz qalǵan stýdentterge;
— múgedektigi bar stýdentterge;
— kóp balaly jáne az qamtylǵan otbasylardan shyqqan stýdentterge;
— aýyl jastaryna,
— «Serpin» jobasy arqyly bilim alýǵa túskenderge;
— qandastarǵa, sondaı-aq basqa da áleýmettik osal sanattarǵa jatatyn stýdentterge beriledi.
Stýdentterdiń jataqhanaǵa ornalasýyna baılanysty máselelerdi jedel ári tıimdi sheshý maqsatynda jańa oqý jylynda Mınıstrlik sıtýatsııalyq jáne daǵdarys ortalyqtaryn ashty. Sıtýatsııalyq ortalyq Qazaq ulttyq pedagogıkalyq qyzdar ýnıversıtetiniń bazasynda, al daǵdarys ortalyǵy M. Tynyshpaev ýnıversıtetiniń bazasynda ashyldy.
— Sıtýatsııalyq ortalyq stýdentterdi jataqhanadaǵy bos oryndar týraly aqparatpen qamtamasyz etse, daǵdarys ortalyǵy fors-majorlyq jaǵdaılarda stýdentterdi ýaqytsha turǵyn úımen qamtamasyz etýge járdemdesedi. Osyǵan baılanysty jataqhanaǵa qatysty qandaı da bir másele týyndaǵan jaǵdaıda sizderge joǵary oqý ornynyń jataqhana máseleleri boıynsha joǵary oqý ornynda jumys isteıtin sıtýatsııalyq ortalyqqa, óńirlik stýdenttik ombýdsmenderge tikeleı jelisine júginýge bolady, — delingen mınıstrlik habarlamasynda.
Sondaı-aq 2023 jylǵy 1 qyrkúıekten bastap jataqhanada turatyn jetim balalarǵa, I jáne II toptaǵy múgedektigi bar adamdarǵa jáne bala kezinen múgedektigi bar adamdarǵa 29 AEK-ke deıin, ıaǵnı 100 050 teńgege deıin ótemaqy qarastyrylǵan.
Qurmetti stýdentter! Qandaı da bir másele nemese qıyndyq týyndaǵan jaǵdaıda, ony óz betinshe sheshýge tyryspaı, joǵaryda kórsetilgen resmı baılanys arnalaryna júginýlerińizdi suraımyz. Mınıstrlik ókilderi, joǵary oqý oryndarynyń ákimshiligi jáne stýdenttik ombýdsmender bilim alýshylarmen turaqty baılanysta jáne týyndaǵan máselelerdi sheshýge qajetti qoldaý kórsetýge daıyn.
Aıta ketelik jataqhanadan oryn almaǵan almatylyq stýdentter qaıda júgine alatyny týraly jazǵan edik.
